ඉරානය විසින් ගල්ෆ් කලාපයේ ඉලක්ක වෙත එල්ල කරන ප්රහාර තවදුරටත් දැඩි කිරීමත් සමඟ ලෝක වෙළඳපොළේ බ්රෙන්ට් (Brent) බොරතෙල් මිල අද (16) දිනයේ බැරලයක් ඇමරිකානු ඩොලර් 105 සීමාව ආසන්නයේ වෙළඳාම් විය. යුද්ධය ආරම්භ වූ දා සිට බොරතෙල් මිල 40% කට වඩා වැඩි අගයකින් ඉහළ ගොස් ඇති අතර, අද උදෑසන වෙළඳාම ආරම්භයේදී එය ඩොලර් 106 සීමාව ද ඉක්මවා ගියේය. අමෙරිකානු බොරතෙල් (WTI) මිල ද 1% කින් ඉහළ ගොස් බැරලයක් ඩොලර් 99.68 ක් ලෙස සටහන් වූ අතර, එය යුද්ධය ඇරඹි දින සිට 50% කට ආසන්න වර්ධනයකි.
මෙම යුදමය වාතාවරණය හේතුවෙන් ගෝලීය කොටස් වෙළඳපොළවල් මිශ්ර ස්වභාවයක් ගෙන තිබේ. ජපානයේ නිකේයි (Nikkei) දර්ශකය 0.4% කින් සහ චීනයේ ෂැංහයි දර්ශකය 0.7% කින් පහත වැටුණු අතර, හොංකොං සහ දකුණු කොරියානු කොටස් දර්ශක සුළු වර්ධනයක් පෙන්නුම් කළේය. හෝමුස් සමුද්ර සන්ධිය වසා දැමීම හේතුවෙන් දෛනිකව බැරල් මිලියන 12 කට අධික තෙල් නිෂ්පාදනයක් වෙළඳපොළෙන් ඉවත්වී ඇති බව රයිස්ටැඩ් එනර්ජි (Rystad Energy) පර්යේෂණ ආයතනය පවසයි. සාමාන්යයෙන් දිනකට තෙල් සහ ස්වභාවික වායු රැගත් නෞකා 25ක් පමණ ගමන් කරන මෙම මුහුදු මාර්ගය අවහිර වීම, ලෝක ආර්ථිකයේ උද්ධමනය ඉහළ යාමට ප්රධානතම හේතුව වී ඇත.
පවතින තත්ත්වය හමුවේ ජාත්යන්තර බලශක්ති ඒජන්සිය (IEA) බැරල් මිලියන 400 ක හදිසි තෙල් සංචිතයක් වෙළඳපොළට මුදා හැරීමට පියවර ගත්ත ද, ඉන් වෙළඳපොළේ පවතින අවිශ්වාසය තුරන් කිරීමට හැකි වී නොමැති බව විශ්ලේෂකයෝ පවසති. උද්ධමනය ඉහළ යාම හේතුවෙන් ඇමරිකානු මධ්යම බැංකුව (Federal Reserve) විසින් පොලී අනුපාත අඩු කිරීමේ හැකියාව ද අඩුවී ඇති අතර, මෙය ඉදිරියේදී ගෝලීය ආර්ථික වර්ධනය තවදුරටත් මන්දගාමී කරනු ඇතැයි අපේක්ෂා කෙරේ.
