ඉරානයේ ඉස්ලාමීය විප්ලවීය ආරක්ෂක බලකාය (IRGC) විසින් මැදපෙරදිග කලාපයේ පිහිටි ඇමරිකානු සහ ඊශ්රායල විශ්වවිද්යාල ඉලක්ක කර ප්රහාර එල්ල කරන බවට දැඩි අනතුරු ඇඟවීමක් නිකුත් කර තිබේ. ටෙහෙරාන් විද්යා හා තාක්ෂණ විශ්වවිද්යාලයට එල්ල වූ ප්රහාරයට ප්රතිචාර දැක්වීමක් ලෙස මෙම තීරණය ගෙන ඇති අතර, ඉරාන විශ්වවිද්යාල දෙකකට එල්ල වූ ප්රහාර වෙනුවෙන් පළිගැනීමක් ලෙස කලාපයේ අනෙකුත් විශ්වවිද්යාල “නීත්යානුකූල ඉලක්ක” ලෙස සලකන බව ඔවුන් පවසා ඇත.
මෙම තත්ත්වය හමුවේ කලාපයේ පිහිටි ඇමරිකානු විශ්වවිද්යාලවල කාර්ය මණ්ඩලය, ආචාර්යවරුන් සහ සිසුන් මෙන්ම ඒ අවට පදිංචිකරුවන්ට සිය ආරක්ෂාව වෙනුවෙන් අදාළ ආයතනවල සිට අවම වශයෙන් කිලෝමීටරයක දුරක් පවත්වා ගන්නා ලෙස ඉරානය දැනුම් දී තිබේ. ඉරාන විශ්වවිද්යාලවලට එල්ල වූ බෝම්බ ප්රහාර ඇමරිකාව විසින් හෙළා දැකිය යුතු බවත්, එසේ නොවන්නේ නම් එළඹෙන අඟහරුවාදා (මාර්තු 30) දේශීය වේලාවෙන් මධ්යහ්න 12:00 න් පසුව ප්රතිප්රහාර එල්ල කරන බවත් එම නිවේදනයේ වැඩිදුරටත් සඳහන් වේ.
මෙම තර්ජනයත් සමඟ මැදපෙරදිග පුරා පිහිටි ජාත්යන්තර අධ්යාපන ආයතනවල ආරක්ෂාව තර කර ඇති අතර, සිසුන් සහ දෙමාපියන් දැඩි භීතියට පත්ව සිටිති. පවතින යුදමය වාතාවරණය හමුවේ අධ්යාපන ක්ෂේත්රය මෙලෙස සෘජු ඉලක්කයක් බවට පත්වීම ජාත්යන්තර ප්රජාවගේ දැඩි අවධානයට ලක්වී ඇති කරුණකි.
