පසුගිය සතියේ ඉරානයේ ප්රධානතම තෙල් අපනයන මධ්යස්ථානයක් වන කාර්ග් දූපතේ (Kharg Island) පිහිටි හමුදා ඉලක්ක වෙත අමෙරිකාව එල්ල කළ ප්රහාරවලින් පසුව වුවද, එරට තෙල් නිෂ්පාදනය සහ අපනයන කටයුතු කිසිදු බාධාවකින් තොරව අඛණ්ඩව සිදුවන බව ඉරාන පාර්ලිමේන්තු බලශක්ති කමිටුවේ ප්රකාශකයෙකු අඟහරුවාදා (17) තහවුරු කළේය. ඉරානයේ සමස්ත තෙල් නැව්ගත කිරීම්වලින් 90%ක්ම සිදු කෙරෙන මෙම මූලෝපායික වැදගත්කමකින් යුත් දූපතේ දෛනික ජන ජීවිතය සුපුරුදු පරිදි පවතින බවත්, එරට අර්ධ නිල තස්නිම් (Tasnim) පුවත් සේවය උපුටා දක්වමින් රොයිටර් පුවත් සේවය වාර්තා කරයි.
කාර්ග් දූපතට එරෙහිව යම් විදේශීය ප්රහාරයක් එල්ල වුවහොත් එය හෝමුස් සමුද්ර සන්ධියේදී අමෙරිකාව සහ ඉශ්රායලය ලැබූ පරාජයටත් වඩා “විශාල අවමානයකට” මග පාදනු ඇති බවට ඉරානය මෙහිදී නැවතත් අනතුරු ඇඟවීමක් සිදු කළේය. හෝමුස් සමුද්ර සන්ධිය හරහා අමෙරිකාවට සහ ඉශ්රායලයට සම්බන්ධ නෞකා ගමනාගමනය වැළැක්වීමට ඉරානය ගෙන ඇති පියවර පෙන්වා දෙමින්, තම තෙල් මධ්යස්ථානවල ආරක්ෂාව තහවුරු කිරීමට ඕනෑම පියවරක් ගන්නා බව එම ප්රකාශකයා වැඩිදුරටත් අවධාරණය කළේය. මැදපෙරදිග යුද වාතාවරණය හේතුවෙන් ගෝලීය වෙළඳපොළේ බොරතෙල් මිල පවුමකට ඩොලර් 103ක් (17 වනදා වන විට) වැනි ඉහළ අගයක පවතින පසුබිමක ඉරානයේ මෙම ප්රකාශය ජාත්යන්තර අවධානයට ලක්ව තිබේ.
