ඉරානය විසින් සිය ඉහළ පෙළේ නායකයන්ගේ ඝාතනයට ප්රතිචාර දැක්වීමක් ලෙස අද (02) අලුයම සිට එක්සත් අරාබි එමීර් රාජ්යය (UAE), කුවේටය, කටාර් සහ බහරේනය යන සමස්ත ගල්ෆ් සහයෝගිතා කවුන්සිලයේ (GCC) රටවල් ඉලක්ක කර ගනිමින් මාරක මිසයිල සහ ඩ්රෝන ප්රහාර මාලාවක් දියත් කර ඇති බව වාර්තා වේ. මෙය ඉතිහාසයේ ප්රථම වතාවට සමස්ත ගල්ෆ් කලාපයටම එල්ල කරන ලද ඒකාබද්ධ ප්රහාරයක් (Coordinated Strike) ලෙස සැලකේ. මෙම ප්රහාරවලින් ඩුබායි (Dubai), දෝහා (Doha), අබුඩාබි (Abu Dhabi) සහ කුවේට් සිටි (Kuwait City) යන නගරවල ජාත්යන්තර ගුවන් තොටුපළවල් වෙත හානි සිදුවී ඇති අතර, සියලුම ගුවන් ගමන් අත්හිටුවා ගුවන් සීමාවන් වසා දැමීමට බලධාරීන් කටයුතු කර තිබේ.
ඩුබායි හි ‘ෆෙයාර්මොන්ට්’ (Fairmont) හෝටලය සහ අබුඩාබි හි ඊශ්රායල තානාපති කාර්යාලය පිහිටි සංකීර්ණය අසලට මිසයිල සුන්බුන් පතිත වීමෙන් පුද්ගලයින් කිහිප දෙනෙකු තුවාල ලබා ඇති බව වාර්තා වේ. එක්සත් අරාබි එමීර් රාජ්යයේ ආරක්ෂක අමාත්යාංශය තහවුරු කරන්නේ මිසයිල 165කින් 152ක් සාර්ථකව විනාශ කළ ද, පාකිස්තාන, නේපාල සහ බංග්ලාදේශ ජාතිකයන් තිදෙනෙකු ජීවිතක්ෂයට පත්ව තවත් 58 දෙනෙකු තුවාල ලබා ඇති බවයි. කටාර් හි දෝහා නුවර හමාඩ් ජාත්යන්තර ගුවන් තොටුපළ (Hamad International Airport) ඉවත් කිරීමට (Evacuation) කටයුතු කර ඇති අතර, කුවේට් ජාත්යන්තර ගුවන් තොටුපළට ද ප්රහාර එල්ල වී ඇති බව වාර්තා වේ.
ගල්ෆ් කලාපය පුරාම ‘Stay Indoors’ හදිසි නියෝග; GCC රටවල් එක්වෙයි
මෙම අනපේක්ෂිත ප්රහාරයත් සමඟ එක්සත් අරාබි එමීර් රාජ්යය සහ කටාර් රජය විසින් සියලුම වැසියන්ට වහාම ආරක්ෂිත ස්ථාන කරා යන ලෙසත්, ජනේල සහ විවෘත ස්ථානවලින් ඈත්ව සිටින ලෙසත් දන්වමින් හදිසි ජංගම දුරකථන පණිවුඩ (National Emergency Alerts) නිකුත් කර තිබේ. මෙම තත්ත්වය හමුවේ GCC විදේශ අමාත්යවරුන් හදිසි වීඩියෝ සාකච්ඡාවක් පවත්වමින් ඉරානයේ “ද්රෝහී ආක්රමණය” දැඩි ලෙස හෙළා දුටු අතර, එක්සත් ජාතීන්ගේ ප්රඥප්තියේ 51 වැනි වගන්තියට අනුව තමන්ට ස්වයං-ආරක්ෂාව සඳහා ප්රතිප්රහාර එල්ල කිරීමේ අයිතිය ඇති බව අවධාරණය කළහ.
ඉරානය විසින් සිය මිසයිල ප්රහාර මාලාව සෞදි අරාබියේ රියාද් සහ නැගෙනහිර පළාත් (Eastern Province) දක්වා ද ව්යාප්ත කර ඇති අතර, ඕමාන් වෙරළට ඔබ්බෙන් වූ තෙල් නැවකට (Oil Tanker) සහ ‘ඩුකුම්’ (Duqm) වරායට ද ඩ්රෝන ප්රහාර එල්ල කර ඇත. ඇමරිකානු ජනාධිපති ඩොනල්ඩ් ට්රම්ප් සහ ඊශ්රායල අගමැති බෙන්ජමින් නෙතන්යාහු ප්රකාශ කර ඇත්තේ ඉරානයේ මෙම ම්ලේච්ඡ ක්රියාවන්ට එරෙහිව කලාපීය මිත්ර රටවල් සමඟ එක්ව දැඩි ක්රියාමාර්ග ගන්නා බවයි.
