ඉරාන-ඇමෙරිකානු යුද ගැටුම් තවදුරටත් උත්සන්න කරමින් අද (08) අලුයම කුවේටය, සෞදි අරාබිය, බහරේනය සහ එක්සත් අරාබි එමීර් රාජ්යය ඉලක්ක කරගනිමින් මහා පරිමාණ ඩ්රෝන සහ මිසයිල ප්රහාර මාලාවක් එල්ල වී ඇති බව වාර්තා වේ. කුවේට් හමුදාව ප්රකාශ කරන්නේ සතුරු ඩ්රෝන රංචුවක් කුවේට් ජාත්යන්තර ගුවන් තොටුපළේ ඉන්ධන ගබඩා පර්යන්ත ඉලක්ක කර ප්රහාර එල්ල කර ඇති බවයි. එහිදී මිසයිල විනාශ කිරීමේදී පතිත වූ සුන්බුන් හේතුවෙන් සිවිල් යටිතල පහසුකම්වලට ද හානි සිදුව ඇති අතර, කුවේට් නගරයේ පිහිටි මහල් 22කින් යුත් සමාජ ආරක්ෂණ ගොඩනැගිල්ලක් (PIFSS) ඩ්රෝන ප්රහාරයකින් ගිනිගෙන විනාශ වන අයුරු විදේශීය මාධ්ය විසින් තහවුරු කර ඇත. මෙම ප්රහාර මාලාව අතරතුර කුවේට් සීමා ආරක්ෂක භටයන් දෙදෙනෙකු ජීවිතක්ෂයට පත්ව ඇති බව එරට රාජ්ය මාධ්ය වාර්තා කළ ද, එය මෙම ප්රහාරයන්ට සෘජුවම සම්බන්ධ ද යන්න තවමත් තහවුරු වී නොමැත.
සෞදි අරාබියේ ආරක්ෂක අමාත්යාංශය ද අද අලුයම දරුණු ඩ්රෝන ප්රහාරයන්ට මුහුණ දී ඇති අතර, එරට ගුවන් ආරක්ෂක පද්ධති මගින් අවම වශයෙන් ඩ්රෝන යානා 21ක් සාර්ථකව විනාශ කර තිබේ. මේ අතර බහරේනයේ අභ්යන්තර කටයුතු අමාත්යාංශය වාර්තා කරන්නේ මිසයිල කොටස් පතිත වීමෙන් විශ්වවිද්යාල ගොඩනැගිල්ලකට හානි සිදුව ඇති අතර පුද්ගලයින් තිදෙනෙකු තුවාල ලබා ඇති බවයි. බහරේනයේ ප්රධාන ජල පිරිපහදු මධ්යස්ථානයකට (Desalination plant) ද මෙම ප්රහාරවලින් හානි සිදුව ඇත. එක්සත් අරාබි එමීර් රාජ්යයේ ජාතික හදිසි අර්බුද සහ ආපදා කළමනාකරණ අධිකාරිය අද අලුයම නිවේදනය කළේ එරට ගුවන් ආරක්ෂක පද්ධති ක්රියාකාරීව පවතින අතර එල්ල වන මිසයිල තර්ජනවලට සාර්ථකව ප්රතිචාර දක්වමින් සිටින බවයි.
මෙම ප්රහාර මාලාව එල්ල වී ඇත්තේ ඉරාන ජනාධිපති මසූඩ් පෙසෙෂ්කියන් විසින් පසුගිය සතියේ ගල්ෆ් කලාපයේ ඇමෙරිකානු කඳවුරු ඉලක්ක කර එල්ල වූ ප්රහාර සම්බන්ධයෙන් සමාව අයැදීමෙන් දිනකට පසුව වීම විශේෂත්වයකි. ඉරාන ජනාධිපතිවරයා මීට පෙර ප්රකාශ කර සිටියේ අසල්වැසි රටවල් ඉරානයට එරෙහි ඇමෙරිකානු ප්රහාරයන්ට සහාය නොදක්වන්නේ නම් ඔවුන් ඉලක්ක නොකරන බවයි. එහෙත් අද අලුයම එල්ල වූ මෙම මහා පරිමාණ ප්රහාරයන් හේතුවෙන් කලාපීය ආරක්ෂාව සහ රාජ්ය තාන්ත්රික සබඳතා පිළිබඳව දැඩි අවිශ්වාසයක් මතු වී තිබේ.
