මැදපෙරදිග කලාපයේ පවතින දරුණු යුදමය වාතාවරණය මධ්යයේ ඉරානයේ රෝහල් 9කට දැඩි හානි සිදුව ඇති බව ඉරාන පාර්ලිමේන්තුවේ සෞඛ්ය කොමිසමේ සාමාජිකා ෆාතිමා මොහොමඩ් බෙයිගි (Fatemeh Mohammad Beigi) තහවුරු කරයි. ඉරාන රජයේ මාධ්ය උපුටා දක්වමින් ඇය පෙන්වා දෙන්නේ ප්රහාරයට ලක්වූ රෝහල්වලින් පහක්ම ටෙහෙරාන් අගනුවර පිහිටා ඇති අතර අනෙක් රෝහල් හතර ඉරානයේ විවිධ නගරවල පිහිටා ඇති බවයි. මෙම තත්ත්වය හමුවේ ඉරානයේ සෞඛ්ය පද්ධතියට දැඩි බලපෑම් එල්ල වෙමින් පවතින බව විදෙස් මාධ්ය වාර්තා කරයි.
විශේෂයෙන්ම ටෙහෙරාන් අගනුවර පිහිටි ප්රධානතම වෛද්ය මධ්යස්ථානයක් වන ‘ගාන්ධි රෝහල’ (Gandhi Hospital) ප්රහාරයත් සමඟ සම්පූර්ණයෙන්ම හිස් කිරීමට බලධාරීන් පියවර ගෙන තිබේ. එහි ප්රතිකාර ලබමින් සිටි රෝගීන් කඩිනමින් ආරක්ෂිත වෙනත් වෛද්ය ආයතන වෙත මාරු කර යැවීමට කටයුතු කර ඇති බව ද ඇය වැඩිදුරටත් සඳහන් කළාය. සිවිල් ජනතාවට සේවා සපයන රෝහල් පද්ධතිය ඉලක්ක වීම හේතුවෙන් කලාපය තුළ පවතින මානුෂීය අර්බුදය තවදුරටත් දරුණු වීමේ අවදානමක් පවතින බව ජාත්යන්තර නිරීක්ෂකයෝ අනතුරු අඟවති.
