ඉරානය විසින් තුර්කිය දෙසට එල්ල කරන ලද මිසයිලයක් නැගෙනහිර මධ්යධරණී මුහුදේ ස්ථාපිත NATO ගුවන් ආරක්ෂණ පද්ධති මගින් සාර්ථකව විනාශ කර ඇති බව තුර්කි ආරක්ෂක අමාත්යාංශය අද (04) තහවුරු කළේය. මැදපෙරදිග යුද ගැටුම්වලට NATO සාමාජික රටක් ඈඳුණු පළමු අවස්ථාව මෙය වුවද, එමඟින් NATO සාමාජික රටවල් සියල්ල යුද්ධයට අවතීර්ණ වන 5 වැනි වගන්තිය (Article 5) සක්රිය වනු ඇතැයි තමන් විශ්වාස නොකරන බව ඇමරිකානු ආරක්ෂක ලේකම් පීට් හෙග්සෙත් ප්රකාශ කළේය. මේ අතර පසුගිය සෙනසුරාදා ඊශ්රායල ප්රහාරයකින් මියගිය අයාතුල්ලා කමේනිගෙන් පසුව ඉරානයේ මීළඟ උත්තරීතර නායකයා ලෙස ඔහුගේ පුත් මොජ්ටාබා කමේනි (Mojtaba Khamenei) පත්වීමේ වැඩි සම්භාවිතාවක් පවතින බව විදෙස් මාධ්ය වාර්තා කරයි.
ශ්රී ලංකාවට ආසන්න මුහුදේදී ඉරාන යුද නෞකාවක් ගිල්වා දැමීම සම්බන්ධයෙන් ද පීට් හෙග්සෙත් මෙහිදී අදහස් දැක්වීය. ඇමරිකානු සබ්මැරීනයක් මඟින් ටෝර්පිඩෝ ප්රහාරයක් එල්ල කර මෙම නෞකාව ගිල්වා ඇති අතර, එම අවස්ථාවේදී එහි සිටි පුද්ගලයන් 80 දෙනෙකු පමණ මියගොස් ඇති බව ශ්රී ලංකාවේ නියෝජ්ය විදේශ අමාත්යවරයා දේශීය රූපවාහිනී නාලිකාවකට තහවුරු කර තිබේ. ඉරාන නාවික හමුදාව සම්පූර්ණයෙන්ම පාහේ විනාශ කර ඇති බව පවසන ඇමරිකාව, ඉරානය දැනටමත් පරාජය වෙමින් පවතින බවත් මෙය කිසිසේත්ම “සමාන සටනක්” නොවන බවත් අවධාරණය කළේය.
මේ අතර ඊශ්රායල හමුදා ලෙබනනයේ දකුණු ප්රදේශය දක්වා සිය ගොඩබිම් මෙහෙයුම් ව්යාප්ත කර ඇති අතර ලිටානි ගඟෙන් දකුණු දෙසට වන්නට ඇති සියලුම ප්රදේශවලින් ඉවත් වන ලෙස සිවිල් වැසියන්ට නියෝග කර ඇත. ඉරානයේ අගනුවර වන ටෙහෙරානයට ද අඛණ්ඩව ගුවන් ප්රහාර එල්ල වෙමින් පවතින අතර, ඊශ්රායල F-35 ප්රහාරක යානයක් විසින් ඉරාන Yak-130 යානයක් වෙඩි තබා බිම හෙළීම ද යුද ඉතිහාසයේ සුවිශේෂී සිදුවීමක් ලෙස සටහන් විය. මෙම යුද වාතාවරණය හේතුවෙන් ආසියානු වෙළෙඳපොළවල් දැවැන්ත කඩාවැටීමකට ලක්ව ඇති අතර දකුණු කොරියාවේ සෝල් නුවර කොටස් වෙළෙඳපොළ වාර්තාගත පසුබෑමක් පෙන්නුම් කරයි.
