ඉරානයේ හිටපු උත්තරීතර නායක අයතුල්ලා අලි කමේනිගේ අභාවයෙන් පසු පුරප්පාඩු වූ එම ධුරය සඳහා ඔහුගේ දෙවන පුත්රයා වන මොජ්ටාබා කමේනි පත්වීමේ වැඩි ඉඩකඩක් පවතින බව නිව්යෝර්ක් ටයිම්ස් පුවත්පත වාර්තා කරනවා. වයස අවුරුදු 56ක් වන මොජ්ටාබා, ඉරාන දේශපාලනය තුළ මෙතෙක් නිල තනතුරු දරා නොමැති වුවද එරට බලවත් ඉස්ලාමීය විප්ලවීය ආරක්ෂක බලකාය (IRGC) සමඟ සමීප සබඳතා පවත්වමින් තිරය පිටුපස සිට විශාල බලයක් මෙහෙයවන පුද්ගලයෙකු ලෙස ප්රකටය. ඔහුගේ මෙම පත්වීම පිළිබඳව තීරණය කරනු ලබන ඉරාන විශේෂඥ මණ්ඩලය (Assembly of Experts) මේ වන විටත් රහසිගත සාකච්ඡා වට කිහිපයක් පවත්වා ඇති අතර ඇතැම් වාර්තා පවසන්නේ ඔහු දැනටමත් එම ධුරය සඳහා තේරී පත්වී ඇති බවයි.
කෙසේ වෙතත් මොජ්ටාබා කමේනිගේ මෙම පත්වීම සම්බන්ධයෙන් ඉරානය තුළ මෙන්ම ජාත්යන්තර වශයෙන් ද විවිධ මතභේද හටගෙන තිබෙනවා. 1979 ඉස්ලාමීය විප්ලවයෙන් පසු රාජාණ්ඩු ක්රමය පිටුදැකීමට කටයුතු කළ ඉරානය තුළ, මෙලෙස පියෙකුගෙන් පසු පුත්රයෙකුට නායකත්වය හිමිවීම පරම්පරාගත පාලනයක් ලෙස හංවඩු ගැසීමේ අවදානමක් පවතින බව විචාරකයින් පෙන්වා දෙනවා. ඇමරිකාව සහ ඊශ්රායලය සමඟ පවතින යුදමය වාතාවරණය හමුවේ නව නායකයා නම් කිරීම හරහා පාලනයේ ස්ථාවරත්වය පෙන්නුම් කිරීමට ඉරානය උත්සාහ කළ ද, ඔහු සෘජු ඉලක්කයක් වීමේ බිය නිසා නිල නිවේදනයක් නිකුත් කිරීම ප්රමාද විය හැකි බව ද සඳහන් වනවා.
