ඉකුත් පෙබරවාරි 28 වැනිදා අමෙරිකානු ප්රහාරයකින් ජීවිතක්ෂයට පත් වූ අයතුල්ලා අලි කමේනිගෙන් පසුව ඉරානයේ මීළඟ උත්තරීතර නායකයා ලෙස පත්විය යුත්තේ කවුද යන්න පිළිබඳව අවසන් තීරණයකට එළඹ ඇති බව ඉරාන විශේෂඥ මණ්ඩලයේ (Assembly of Experts) සාමාජිකයෝ ඉඟි කරති. අල්ජසීරා පුවත් සේවය උපුටා දක්වමින් මෙම තොරතුරු වාර්තා වේ.
මෙම තීරණාත්මක දේශපාලන වර්ධනය පිළිබඳ තොරතුරු මෙසේය. විශේෂඥ මණ්ඩලයේ සාමාජිකයෙකු වන අයතුල්ලා මොහොමඩ්-මහ්දි මිර්බගෙරි සඳහන් කරන්නේ නායකත්වය තීරණය කිරීම සඳහා විශාල උත්සාහයක් ගෙන ඇති බවත් ඒ සම්බන්ධයෙන් නිශ්චිත සහ ඒකමතික මතයකට එකඟ වී ඇති බවත්ය. විශේෂඥ මණ්ඩලයේ සන්ජාන් (Zanjan) නියෝජිත හොජ්ජටොලෙස්ලාම් ජෆාරි පවසා ඇත්තේ මේ පිළිබඳව සියලුම ඉරාන වැසියන් ඉක්මනින්ම සතුටු වනු ඇතැයි තමා බලාපොරොත්තු වන බවයි. තෙවන නායකයා තෝරා ගැනීමේ ප්රමාදය සැමටම අසීරු වුවත් මෙම දුෂ්කර අවස්ථාවේ නියෝජිතයන් පිළිබඳව නරක අදහස් ඇති කර නොගත යුතු බව ඔහු වැඩිදුරටත් සඳහන් කර තිබේ.
ඉරාන ආණ්ඩුක්රම ව්යවස්ථාවට අනුව සාමාජිකයන් 88 දෙනෙකුගෙන් යුත් විශේෂඥ මණ්ඩලය නව උත්තරීතර නායකයෙකු තෝරා පත් කර ගැනීමේ වගකීම දරයි. වසර 37කට ආසන්න කාලයක් ඉරානය පාලනය කළ අලි කමේනි ඝාතනය වීමෙන් පසු මෙම තීරණාත්මක තේරීම සිදු කිරීමට නියමිතව ඇත්තේ කලාපීය යුදමය උණුසුම උපරිම මට්ටමක පවතින පසුබිමකය.
