ඊශ්රායලය සහ එක්සත් ජනපදය සමඟ පවතින යුද්ධය අවසන් කිරීම සඳහා ඉරානයට “අවශ්ය කැමැත්ත” පවතින නමුත්, මෙම ගැටුම යළිත් ඇති නොවන බවට විශ්වසනීය සහතිකයක් අවශ්ය බව ඉරාන ජනාධිපති මසූඩ් පෙසෙෂ්කියන් (Masoud Pezeshkian) ප්රකාශ කර තිබේ. යුරෝපීය කවුන්සිලයේ සභාපති ඇන්ටෝනියෝ කොස්තා (Antonio Costa) සමඟ පැවති දුරකථන සංවාදයකදී ඉරාන ජනාධිපතිවරයා මේ බව අවධාරණය කළ බව ඔහුගේ කාර්යාලය නිකුත් කළ නිවේදනයක දැක්වේ.
යුද්ධය අවසන් කිරීම සඳහා පසුගිය සතියේදී එක්සත් ජනපදය ඉදිරිපත් කළ කරුණු 15කින් යුත් සැලැස්මට ප්රතිචාර දක්වමින් ඉරානය කරුණු 5කින් සමන්විත ප්රති-යෝජනාවක් (Counterproposal) ඉදිරිපත් කර ඇත. එහිදී ද ප්රහාර වහාම නතර කරන ලෙසත්, ඊශ්රායලය හෝ එක්සත් ජනපදය යළි කිසිදු දිනක යුද්ධයකට එළඹෙන්නේ නැති බවට සහතික වන විශේෂ යාන්ත්රණයක් සකස් කරන ලෙසත් ඉරානය ඉල්ලා තිබේ.
වත්මන් යුද්ධය සම්බන්ධයෙන් යුරෝපය අනුගමනය කරන ස්ථාවරය දැඩි ලෙස විවේචනය කළ පෙසෙෂ්කියන්, ඇමරිකානු සහ ඊශ්රායල ප්රහාර හමුවේ යුරෝපා සංගමය නිහඬව සිටීම ඔවුන් පවසන මානව හිමිකම් ප්රකාශයන්ට පටහැනි බව පෙන්වා දුන්නේය. මේ අතර ඇන්ටෝනියෝ කොස්තා සඳහන් කළේ යුරෝපය ඉරානයට එල්ල වන ප්රහාරයන්ට සහය නොදක්වන බවත්, කඩිනමින් රාජ්ය තාන්ත්රික විසඳුමකට එළඹිය යුතු බවත්ය.
ඉරාන බලධාරීන්ට අනුව පසුගිය පෙබරවාරි 28 වනදා ආරම්භ වූ මෙම යුද්ධයෙන් මේ වන විට ඉරාන වැසියන් විශාල ප්රමාණයක් මිය ගොස් ඇති අතර රතු අඩසඳ සංගමය පෙන්වා දෙන්නේ පාසල්, නිවාස සහ ආයතන ඇතුළු සිවිල් ස්ථාන ලක්ෂයකට අධික ප්රමාණයකට හානි සිදුව ඇති බවයි.
