අධිකරණ ක්ෂේත්රයේ කාර්යක්ෂමතාව, විනිවිදභාවය සහ වගවීම තවදුරටත් ඉහළ නැංවීමේ අරමුණින් යුතුව අධිකරණ සහ ජාතික ඒකාබද්ධතා අමාත්යාංශයේ නව කළමනාකරණ තොරතුරු පද්ධතිය (MIS) සහ නවීකරණය කරන ලද නිල වෙබ් අඩවිය පසුගිය (31) දින නිල වශයෙන් ජනගත කර තිබේ. අධිකරණ සහ ජාතික ඒකාබද්ධතා අමාත්ය නීතිඥ හර්ෂණ නානායක්කාර මහතාගේ ප්රධානත්වයෙන් මෙම උත්සවය අමාත්යාංශ ශ්රවණාගාරයේදී පවත්වා ඇත.
මෙම නව කළමනාකරණ තොරතුරු පද්ධතිය ප්රධාන වශයෙන්ම සැලසුම් කර ඇත්තේ සාම විනිසුරුවරුන් (JP), දිවුරුම් කොමසාරිස්වරුන්, හදිසි මරණ පරීක්ෂකවරුන්, නිල නොවන මහේස්ත්රාත්වරුන් සහ දිවුරුම් දුන් පරිවර්තකයන් වැනි සේවා තනතුරු සඳහා පුද්ගලයන් පත් කිරීමේ ක්රියාවලිය වඩාත් විධිමත් මෙන්ම වෘත්තීය මට්ටමකට පත් කිරීම සඳහාය. මෙතෙක් පැවති ක්රමවේදයන් වෙනුවට ව්යුහාත්මක ක්රමවේද සහ දියුණු තේරීම් නිර්ණායක හඳුන්වා දීම හරහා මෙම පද්ධතිය මඟින් පත්වීම්වල විනිවිදභාවය සහ විශ්වසනීයත්වය ඉහළ නංවන අතරම, පරිපාලනමය ප්රමාදයන් සහ අක්රමිකතා ද අවම කරනු ඇත.
මෙම අවස්ථාවට අධිකරණ සහ ජාතික ඒකාබද්ධතා අමාත්යාංශයේ ලේකම් ජනාධිපති නීතිඥ අයේෂා ජිනසේන මෙනෙවිය, යුරෝපා සංගමයේ මෙරට නියෝජ්ය ප්රධානී එඩෝඩෝ ස්පැකා (Edoardo Spacca) මහතා, එක්සත් ජාතීන්ගේ සංවර්ධන වැඩසටහනෙහි (UNDP) මෙරට නියෝජ්ය ප්රධානී මරීනා ටෙන් (Marina Ten) මහත්මිය සහ අමාත්යාංශයේ අතිරේක ලේකම් (ප්රතිසංස්කරණ) කිශාන්ති මීගහපොළ මහත්මිය ඇතුළු උසස් නිලධාරීන් රැසක් සහභාගී වී අදහස් දක්වා තිබේ.
