මැදපෙරදිග කලාපයේ පවතින දැඩි යුදමය තත්ත්වය අවසන් කිරීම සඳහා අමෙරිකාව ඉදිරිපත් කළ සාම යෝජනා මාලාව තමන් දැනට සලකා බලමින් සිටින නමුත්, අමෙරිකාව සමඟ සෘජු සාකච්ඡා පැවැත්වීමට ඉරානයට කිසිදු අදහසක් නොමැති බව ඉරාන විදේශ අමාත්ය අබ්බාස් අරගච් අද (2026 මාර්තු 26) ප්රකාශ කළේය. මැදිහත්කරුවන් මාර්ගයෙන් පණිවුඩ හුවමාරු කර ගැනීම යනු අමෙරිකාව සමඟ සාකච්ඡා කිරීමක් නොවන බව ඔහු ඉරාන රජයේ රූපවාහිනිය ඔස්සේ අවධාරණය කර සිටියේය.
ජනාධිපති ඩොනල්ඩ් ට්රම්ප් විසින් පකිස්ථානය හරහා ඉරානය වෙත යොමු කරන ලද කරුණු 15කින් යුත් සාම සැලැස්ම පිළිබඳව ඉරාන ඉහළ බලධාරීන් දැනුවත් කර ඇති අතර, අවශ්යතාවයක් වුවහොත් ඒ පිළිබඳ නිල ස්ථාවරය ප්රකාශයට පත් කරන බව ද විදේශ අමාත්යවරයා පැවසීය. අදාළ සාම සැලැස්මට අනුව ඉරානයේ යුරේනියම් තොග ඉවත් කිරීම, මිසයිල පද්ධති සීමා කිරීම සහ කලාපීය සන්නද්ධ කණ්ඩායම්වලට ලබා දෙන ආධාර නතර කිරීම වැනි දැඩි කොන්දේසි ඇතුළත් වන බව වාර්තා වේ.
මේ අතර ධවල මන්දිර මාධ්ය ලේකම් කැරොලයින් ලෙවිට් ප්රකාශ කළේ ඉරානය මෙම සාම යෝජනා තේරුම් ගැනීමට අපොහොසත් වුවහොත් ජනාධිපති ට්රම්ප් විසින් මීට පෙර කිසිදා නොවූ විරූ දැඩි ප්රහාරයක් ඉරානය වෙත එල්ල කරන බවයි. කෙසේ වෙතත්, ඊශ්රායල ආරක්ෂක බලධාරීන් මෙම සාම සැලැස්ම පිළිබඳව සැක පළ කරන අතර, ඕනෑම එකඟතාවකදී තම රටේ ආරක්ෂාව වෙනුවෙන් පූර්ව ප්රහාර (Pre-emptive strikes) එල්ල කිරීමේ අයිතිය තමන් සතු විය යුතු බව ඔවුහු අවධාරණය කරති.
