ඉරානයේ 86 හැවිරිදි උත්තරීතර නායක අයතුල්ලා අලි කිමේනි (Ali Khamenei) පසුගිය සෙනසුරාදා උදෑසන තෙහෙරානයේ පිහිටි ඔහුගේ නිල නිවසේදී ඊශ්රායල සහ ඇමෙරිකානු ගුවන් ප්රහාරයකින් ජීවිතක්ෂයට පත්ව ඇති බව අද (මාර්තු 03) විදෙස් මාධ්ය වාර්තා කළේය. ප්රහාරය එල්ල වන අවස්ථාවේදී ඔහු ආරක්ෂිත බංකරයක සැඟවී නොසිටි බව එම වාර්තාවල වැඩිදුරටත් සඳහන් වේ.
ෆිනෑන්ෂල් ටයිම්ස් (Financial Times) පුවත්පතට අනුව, කිමේනි ඝාතනය කිරීමේ මෙහෙයුම වසර ගණනාවක් පුරා ඊශ්රායල සහ ඇමෙරිකානු බුද්ධි අංශ විසින් සැලසුම් කරන ලද්දකි. තෙහෙරාන් නුවර මාර්ගවල ඇති කැමරා කෝණ, ජංගම දුරකථන සංඥා සහ ඔහුගේ ආරක්ෂක නිලධාරීන්ගේ දෛනික චර්යාවන් පවා ඉතා නිවැරදිව නිරීක්ෂණය කරමින් මෙම ප්රහාරය දියත් කර තිබේ. ඔහුගේ මිත්රයෙකු වූ හසන් නස්රල්ලා මෙන් භූගත බංකරවල සැඟවී සිටීමට කිමේනි කැමැත්තක් නොදැක්වූ අතර, ඔහු ප්රසිද්ධියේ පවා ප්රකාශ කර තිබුණේ තමා ඝාතනය වීම ඉස්ලාමීය සමූහාණ්ඩුවේ පැවැත්මට බලපෑමක් නොවන බවයි.
ප්රහාරය එල්ල වූ අවස්ථාවේදී ඔහු සිය ආරක්ෂිත බංකර දෙකෙන් එකක සිටියේ නම් ඊශ්රායල බෝම්බවලට ඔහු වෙත ළඟා විය නොහැකි බව විශ්ලේෂකයෝ පවසති. මෙම ඝාතනය ඇණවුම් කළ බව පවසන ඩොනල්ඩ් ට්රම්ප් සඳහන් කළේ, ඉරානය සිය න්යෂ්ටික අවි නිෂ්පාදනය නතර කිරීමට එකඟ නොවීම හේතුවෙන් මෙම තීරණය ගත් බවයි.
