පසුගිය පෙබරවාරි 28 වැනිදා සිට ඇමෙරිකාව සහ ඊශ්රායලය එක්ව ඉරානයට එල්ල කරන දරුණු ප්රහාර හේතුවෙන් එරට විශ්වවිද්යාල 30ක් සම්පූර්ණයෙන්ම විනාශ වී ඇති බව ඉරාන රජය නිල වශයෙන් ප්රකාශ කර තිබේ. ඉරාන න්යෂ්ටික වැඩසටහන අඩපණ කිරීම සහ එරට පාලන තන්ත්රය වෙනස් කිරීම අරමුණු කරගනිමින් මෙම ප්රහාර එල්ල වන අතර, උතුරු ටෙහෙරානයේ පිහිටි ප්රමුඛතම සහීඩ් බෙහෙෂ්ටි විශ්වවිද්යාලයේ ලේසර් සහ ප්ලාස්මා පර්යේෂණායතනය ද පසුගිය 3 වැනිදා එල්ල වූ බෝම්බ ප්රහාරයකින් සම්පූර්ණයෙන්ම විනාශ වී ඇත.
යුද වාතාවරණය හමුවේ ඉරාන රජය අධ්යයන කටයුතු අන්තර්ජාලය ඔස්සේ සිදු කිරීමට පියවර ගෙන තිබීම හේතුවෙන් මෙම විශ්වවිද්යාල ප්රහාරවලින් සිසුන්ගේ ජීවිත හානි වාර්තා වී නොමැති වීම සුවිශේෂී කරුණකි. කෙසේ වෙතත්, වසර 100කට වඩා පැරණි පාස්චර් ආයතනය ඇතුළු සෞඛ්ය මධ්යස්ථාන 20කට අධික සංඛ්යාවකට ද ප්රහාර එල්ල වී ඇති බව ලෝක සෞඛ්ය සංවිධානය තහවුරු කර තිබේ. ඉරාන රජයේ දත්තවලට අනුව මෙම සමස්ත යුද ගැටුම් හේතුවෙන් මේ වන විට පුද්ගල මරණ 2,000කට අධික සංඛ්යාවක් වාර්තා වී ඇත.
ඇමෙරිකානු ජනාධිපති ඩොනල්ඩ් ට්රම්ප් දැඩි ලෙස අවධාරණය කර ඇත්තේ හෝමූස් සමුද්ර සන්ධිය වහාම විවෘත කිරීමට ඉරානය පියවර නොගතහොත්, එරට අධ්යාපන ආයතනවලට පමණක් නොව පාලම් සහ විදුලි බලාගාර වැනි සියලුම යටිතල පහසුකම් ඉලක්ක කර ගනිමින් දැවැන්ත ප්රහාර මාලාවක් එල්ල කරන බවයි. මෙම තර්ජනාත්මක ප්රකාශයත් සමඟ කලාපීය යුද උණුසුම තවදුරටත් වර්ධනය වී ඇති බව විදෙස් මාධ්ය වාර්තා පෙන්වා දෙයි.
