ඊශ්රායලය විසින් ලෙබනනය වෙත එල්ල කරනු ලබන අඛණ්ඩ ප්රහාර හේතුවෙන්, මෙම සති අන්තයේ පකිස්ථානයේ ඉස්ලාමාබාද් නුවරදී ඇමෙරිකා එක්සත් ජනපදය සමඟ පැවැත්වීමට නියමිතව තිබූ සාකච්ඡා සඳහා සහභාගී වීමට සිටි ඉරාන නියෝජිත පිරිස මෙතෙක් ටෙහෙරාන් නුවරින් පිටත්ව ගොස් නොමැති බව වාර්තා වෙයි. ලෙබනනයට එල්ල වන ප්රහාර නතර වන තෙක් කිසිදු සාකච්ඡාවකට එක් නොවන බවට ඉරාන පාර්ශවය දැඩි ස්ථාවරයක පසුවන බව මැදපෙරදිග උපායමාර්ගික අධ්යයන මධ්යස්ථානයේ ජ්යෙෂ්ඨ පර්යේෂක අබාස් අස්ලානි මහතා අල් ජසීරා පුවත් සේවයට ප්රකාශ කර තිබේ.
මෙම තත්ත්වය හමුවේ දෙරට අතර පැවැත්වීමට තිබූ සාකච්ඡා පිළිබඳ දැඩි අවිනිශ්චිතතාවක් මතු වී ඇති අතර, මීට පෙර එකඟතාවකට පැමිණ තිබූ කරුණු 10කින් යුත් සැලැස්ම සම්බන්ධයෙන් ඇමෙරිකානු පාර්ශවය දක්වන මෑතකාලීන දේශපාලනික වෙනස්වීම් ද මෙම අර්බුදයට හේතු වී ඇත. ඇමෙරිකාව ලබාදෙන පොරොන්දු කෙරෙහි පවතින විශ්වාසය බිඳවැටීම ඉරානය මුහුණ දෙන ප්රධාන ගැටලුවක් වී ඇති අතර, සාකච්ඡා වට කිහිපයක් පවතින අතරතුරදීම ඉරානයට දෙවතාවක් ප්රහාර එල්ල වීම හේතුවෙන් යළිත් ඇමෙරිකාව සමඟ සාකච්ඡා මේසයට වාඩි වීම පිළිබඳව ඉරාන මහජනතාවගෙන් ද එල්ල වන පීඩනය ඉහළ ගොස් ඇති බව අස්ලානි මහතා වැඩිදුරටත් පෙන්වා දෙයි.
