ඉරාන යුද්ධය හේතුවෙන් ඉහළ ගොස් ඇති ඉන්ධන මිල ගණන් ඉදිරි සති කිහිපය තුළ යළි පහත වැටෙනු ඇති බව ඇමරිකානු බලශක්ති ලේකම් ක්රිස් රයිට් (Chris Wright) ප්රකාශ කරයි. මෙම මිල ඉහළ යාම මාස ගණනාවක් පවතින තත්ත්වයක් නොවන බවත්, ඇමරිකාව විසින් ඉරානයේ බලශක්ති කර්මාන්තය ඉලක්ක කර ප්රහාර එල්ල කිරීමට කිසිදු සැලසුමක් නොමැති බවත් ඔහු අවධාරණය කළේය.
හෝමුස් සමුද්ර සන්ධියේ නාවික ගමනාගමනය සීමා වීම සහ මැදපෙරදිග තෙල් නිෂ්පාදනය අඩාල වීම නිසා ලෝක වෙළඳපොළේ බොරතෙල් මිල 35%කින් පමණ ඉහළ ගොස් තිබේ. මේ හේතුවෙන් ඇමරිකාව තුළ ද පෙට්රල් ගැලුමක මිල ඩොලර් 3.41 දක්වා ඉහළ ගොස් ඇති අතර, එය ඩොලර් 3ට වඩා අඩු මට්ටමකට කඩිනමින් රැගෙන ඒම රජයේ අරමුණයි. ටෙහෙරාන් නුවර ඉන්ධන ගබඩාවලට එල්ල වූ ප්රහාර ඊශ්රායලය විසින් සිදුකළ ඒවා මිස ඇමරිකානු මැදිහත්වීමක් එහි නොමැති බව ලේකම්වරයා වැඩිදුරටත් පැහැදිලි කළේය.
ධවල මන්දිර ප්රකාශක කැරොලයින් ලීවිට් පෙන්වා දෙන්නේ ඉන්ධන මිලෙහි මෙම කෙටිකාලීන වැඩිවීම, ඉරාන ත්රස්තවාදී පාලනය අවසන් කර හෝමුස් සමුද්ර සන්ධියේ බලශක්ති ගමනාගමනය නිදහස් කිරීම වෙනුවෙන් විඳීමට සිදුවන තාවකාලික කැපකිරීමක් බවයි. ඉරානයේ නාවික සහ මිසයිල බලය මේ වන විට 90%කින් පමණ දුර්වල වී ඇති බවත්, නාවික යාත්රාවලට ඇමරිකානු හමුදා ආරක්ෂාව ලබාදීම හරහා ඉදිරි දිනවලදී තෙල් ප්රවාහන කටයුතු යථා තත්ත්වයට පත් වනු ඇති බවත් ඇමරිකානු රජය විශ්වාස කරයි.
ඉදිරි නොවැම්බර් මැතිවරණය හමුවේ ජීවන වියදම ප්රධානතම මාතෘකාව වී ඇති පසුබිමක, ජනාධිපති ඩොනල්ඩ් ට්රම්ප් ද ප්රකාශ කර ඇත්තේ ඉන්ධන මිල ඉහළ යාම පිළිබඳව තමන් දැඩි ලෙස කනස්සල්ලට පත් නොවන බවත්, යුද්ධය අවසන් වූ පසු මිල ගණන් වේගයෙන් පහත වැටෙනු ඇති බවත්ය. ඉරානයේ න්යෂ්ටික සහ මිසයිල තර්ජනය තුරන් කිරීම ඉන්ධන මිලෙහි සුළු වැඩිවීමට වඩා වැදගත් බව ඇමරිකානු පරිපාලනයේ මතය වී තිබේ.
