ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක මහතා සහ අයර්ලන්තයේ විශාලතම වෘත්තීය සමිතිය වන SIPTU (Services Industrial Professional and Technical Union) නියෝජිතයින් අතර විශේෂ හමුවක් පසුගියදා අයර්ලන්තයේදී පැවැත්විණි. අයර්ලන්තයේ ප්රධාන වෘත්තීය සමිති දෙකක් ඒකාබද්ධ වීමෙන් පිහිටුවා ඇති මෙම සංගමය, එරට කම්කරු අයිතිවාසිකම් වෙනුවෙන් පෙනී සිටින ප්රධානතම බලවේගයකි.
අමාත්යවරයාගේ අයර්ලන්ත සංචාරයට සමගාමීව පැවැති මෙම සාකච්ඡාවේදී ශ්රී ලංකාවේ වත්මන් දේශපාලන සහ ආර්ථික ගමන්මග පිළිබඳව SIPTU නියෝජිතයෝ දැඩි උනන්දුවක් දැක්වූහ. විශේෂයෙන්ම ජාත්යන්තර මූල්ය අරමුදල (IMF) සමඟ එක්ව ශ්රී ලංකාව ක්රියාත්මක කරන ආර්ථික වැඩපිළිවෙළ සහ ඉන් රටේ සංවර්ධනයට ලැබෙන දායකත්වය පිළිබඳව මෙහිදී දීර්ඝ වශයෙන් කරුණු විමසා සිටියහ.
එමෙන්ම, ශ්රී ලංකාවේ පැවති දශක තුනක යුද්ධයෙන් පසු උතුරේ සහ දකුණේ පීඩාවට පත් ජනතාවගේ සුභසාධනය වෙනුවෙන් රජය ගෙන යන ප්රතිපත්ති පිළිබඳව ද අවධානය යොමු විය. පසුගිය මැතිවරණවලදී උතුරේ ජනතාවගේ විශ්වාසය දිනා ගැනීමට රජය සමත් වූ ආකාරය සහ පාර්ලිමේන්තුවේ ආසන 3 සිට 159 දක්වා ජනවරම වර්ධනය කර ගනිමින් මෙරට තුළ නව දේශපාලන සංස්කෘතියක් ගොඩනැගීමට ගෙන ඇති පියවර පිළිබඳව ද අමාත්ය බිමල් රත්නායක මහතා එහිදී පැහැදිලි කළේය.
