ශ්රී ලංකීය පාසල් රග්බි පිටියේ “හරිත යන්ත්රය” (Green Machine) ලෙස විරුදාවලිය ලත් ඉසිපතන විද්යාලයීය රග්බි කණ්ඩායමේ 2026 වසර සඳහා වන අනුග්රාහක උපහාර උළෙල සහ මාධ්ය හමුව අප්රේල් 08 වනදා කොළඹ ග්රෑන්බෙල් හෝටලයේදී උත්කර්ෂවත් ලෙස පැවැත්විණි. අනුග්රාහකයින්, ආදි සිසුන් සහ මාධ්යවේදීන් විශාල පිරිසකගේ සහභාගීත්වයෙන් පැවැති මෙම උත්සවය ඉසිපතන රග්බි ක්රීඩාවේ අභිමානවත් ඉතිහාසය සැමරීමට මෙන්ම අනාගත ජයග්රාහී මාවත විවර කිරීමට තැබූ සුවිශේෂී පියවරක් ලෙස සැලකේ.
1960 දශකයේ මුල් භාගයේ සිට ශ්රී ලංකීය රග්බි ක්රීඩාවේ ප්රමුඛ බලවේගයක් බවට පත් වූ ඉසිපතන විද්යාලය, මේ වන විට මෙරට පාසල් රග්බි ඉතිහාසයේ වැඩිම ජයග්රහණ ප්රමාණයක් හිමිකර ගත් පාසල බවට පත්ව තිබේ. ජනාධිපති කුසලාන ශූරතා 14ක්, ලීග් ශූරතා 14ක් සහ පිළිමලුන් පිටුදැකීමේ ශූරතා 15ක් ඇතුළුව දක්ෂතා රැසක් ප්රදර්ශනය කර ඇති ඔවුන්, ජාතික මට්ටමේ රග්බි ක්රීඩකයන් 70කට අධික පිරිසක් සහ ජාත්යන්තර මට්ටමේ විනිසුරුවන් මෙන්ම පුහුණුකරුවන් ද රග්බි පිටියට දායාද කර ඇත.
2026 රග්බි තරග සමය සඳහා ඉසිපතන කණ්ඩායමේ ප්රධාන පුහුණුකරු ලෙස ප්රවීණ පුහුණුකරුවෙකු වන සනත් මාර්ටිස් මහතා යළි පත්වීම මෙම වසරේ කැපී පෙනෙන විශේෂත්වයකි. මීට අමතරව ෆීජී ජාතික හිටපු ජාත්යන්තර ක්රීඩක සයිමෝනි රොකිනි උපදේශකවරයෙකු ලෙස එක්වීම කණ්ඩායමේ ශක්තිය තවදුරටත් ඉහළ නැංවීමට හේතුවනු ඇත. මෙවර කණ්ඩායමේ නායකත්වය ශාකිබ් සුම්රි විසින් දරනු ලබන අතර නිමත සන්දීප සහ අබ්දුල් අසීස් උප නායකයින් ලෙස කටයුතු කරති.
මෙම වසරේ ප්රධාන අනුග්රාහකයා ලෙස “Fortune Soy” ආයතනය කටයුතු කරන අතර KFC සහ Sense.lk සම අනුග්රාහකත්වය දක්වති. මීට අමතරව Macson Mesh Industries, TVS, MAS ඇතුළු ආයතන රැසක් ඉසිපතන රග්බි ක්රීඩාවේ දියුණුව වෙනුවෙන් සිය දායකත්වය සපයති. මැදපෙරදිග අර්බුදය හමුවේ ආර්ථික අභියෝග මතු වී ඇති පසුබිමක වුවද, මෙරට පාසල් රග්බි ක්රීඩාව ඉහළ ප්රමිතියෙන් යුතුව පවත්වාගෙන යාමට මෙවැනි ආයතනික අනුග්රාහකත්වයන් මහත් පිටුවහලක් වන බව ක්රීඩා විචාරකයෝ පෙන්වා දෙති.
