නූතන යුද ඉතිහාසයේ එල්ල වූ දරුණුතම “හිස ගසා දැමීමේ ප්රහාරය” (Decapitation Strike) ලෙස හඳුන්වමින්, ඊශ්රායල ආරක්ෂක බලකාය (IDF) නිවේදනය කරන්නේ ඔවුන්ගේ පළමු ගුවන් ප්රහාර මාලාවෙන්ම ඉරාන පාලන තන්ත්රයේ සහ ආරක්ෂක අංශවල ජ්යෙෂ්ඨ නිලධාරීන් 40කට අධික පිරිසක් ඝාතනය කිරීමට සමත් වූ බවයි. ටෙහෙරාන් නුවර පිහිටි ආරක්ෂිත බංකර් සහ රහසිගත මෙහෙයුම් මධ්යස්ථාන ඉලක්ක කරගනිමින් එල්ල වූ මෙම ප්රහාරවලින් ඉරාන ඒකාබද්ධ හමුදා මාණ්ඩලික ප්රධානී අබ්දුල්රහීම් මූසාවි ඇතුළු ඉහළ පෙළේ හමුදා ප්රධානීන් රැසක් ජීවිතක්ෂයට පත්ව ඇති බව තහවුරු වේ. මෙමඟින් ඉරානයේ අණදීමේ සහ පාලන ව්යුහය (Chain of Command) සම්පූර්ණයෙන්ම අකර්මන්ය වී ඇති බව ආරක්ෂක විශ්ලේෂකයෝ පෙන්වා දෙති.
ඊශ්රායල අගමැති බෙන්ජමින් නෙතන්යාහු මෙම මෙහෙයුම හඳුන්වා දුන්නේ ඉරාන “ත්රස්තවාදී දැවන්තයාගේ හිස” ඉවත් කිරීමක් ලෙසය. මියගිය පිරිස අතර ඉරාන විප්ලවීය ආරක්ෂක බලකායේ (IRGC) බුද්ධි අංශ ප්රධානීන්, මිසයිල බලඇණි මෙහෙයවන ජෙනරාල්වරුන් සහ උත්තරීතර නායකයාගේ සමීපතම උපදේශකයන් සිටින බව වාර්තා වේ. මෙම පෙර නොවූ විරූ ප්රහාරය හේතුවෙන් ඉරාන රජය දැඩි අර්බුදයකට පත්ව ඇති අතර, ඉතිරිව සිටින නායකයින් රහසිගත ස්ථාන කරා පසුබැස ඇති බවත්, රටේ ආරක්ෂක තීරණ ගැනීමේ ක්රියාවලිය දැඩි ලෙස ප්රමාද වී ඇති බවත් බටහිර බුද්ධි අංශ තහවුරු කරයි.
