ඊශ්රායලයේ ටෙල් අවිව් නුවරට දකුණින් පිහිටි, ලක්ෂ දෙකකට අධික ජනගහනයක් වෙසෙන හොලොන් (Holon) නගරය ඉලක්ක කරගනිමින් ඉරානය මේ වන විට නොකඩවා බැලැස්ටික් මිසයිල ප්රහාර එල්ල කරමින් සිටින බව වාර්තා වේ. 2026 අප්රේල් 01 වනදා එල්ල වූ මෙම ප්රහාරවලින් හොලොන් නගරයේ ස්ථාන කිහිපයකට දැඩි හානි සිදුව ඇති අතර, නේවාසික ගොඩනැගිලිවලට ද හානි සිදුව ඇති බව විදෙස් මාධ්ය තහවුරු කරයි. ඉරානය විසින් වරින් වර මෙලෙස මධ්යම ඊශ්රායලය වෙත මිසයිල වර්ෂා එල්ල කරමින් සිටින්නේ, අමෙරිකානු සහ ඊශ්රායල ප්රහාරවලට ප්රතිචාර දැක්වීමක් ලෙසය.
මෙම ප්රහාරය එල්ල වන්නේ අමෙරිකානු ජනාධිපති ඩොනල්ඩ් ට්රම්ප් විසින් ඉරානය සමඟ සටන් විරාමයකට එළඹීමට ආසන්න බව පවසමින් සිටින මොහොතක වීම විශේෂත්වයකි. ට්රම්ප් සිය “ටෘත් සෝෂල්” (Truth Social) ගිණුම හරහා ප්රකාශ කර තිබුණේ ඉරානයේ නව නායකයා සටන් විරාමයක් ඉල්ලා ඇති බවයි. කෙසේ වෙතත්, ඉරාන විදේශ අමාත්ය අබ්බාස් අරග්චි (Abbas Araghchi) එම ප්රකාශය ප්රතික්ෂේප කරමින් අල් ජසීරා පුවත් සේවයට ප්රකාශ කර ඇත්තේ අමෙරිකාව සමඟ සාකච්ඡා කිරීමට කිසිදු පදනමක් නොමැති බවත්, ඔවුන් කෙරෙහි පවතින විශ්වාසය “බිංදුවක්” බවත්ය.
හොලොන් නගරයට එල්ල වූ මෙම ප්රහාර හමුවේ ඊශ්රායලයේ “අයන් ඩෝම්” (Iron Dome) සහ “ඇරෝ” (Arrow) ආරක්ෂක පද්ධති ක්රියාත්මක වුවද, ඇතැම් මිසයිල කැබලි පතිත වීමෙන් සිවිල් වැසියන් තුවාල ලබා ඇති බව “මගෙන් ඩේවිඩ් ඇඩම්” (MDA) හදිසි සේවා වාර්තා කරයි. ට්රම්ප් පාලනය විසින් හෝමුස් සමුද්ර සන්ධිය විවෘත කරන ලෙස බල කරමින් සිටින පසුබිමක, ඉරානය මෙලෙස සිය හමුදාමය ශක්තිය ප්රදර්ශනය කිරීම හරහා පෙනී යන්නේ මැදපෙරදිග කලාපය සැබෑ සටන් විරාමයකින් තවමත් බොහෝ ඈතින් පසුවන බවයි.
තොරතුරු උපුටා ගැනීම: Mario Nawfal (X) ඇසුරින්
