ඉරානය සහ හෙස්බොල්ලා සංවිධානය විසින් එල්ල කරනු ලබන අඩු පිරිවැය සහිත නියමුවන් රහිත යානා (UAVs) හෙවත් ඩ්රෝන ප්රහාර හේතුවෙන් ඊශ්රායලයේ ලොව සුපතළ ගුවන් ආරක්ෂක පද්ධති පෙර නොවූ විරූ අභියෝගයකට මුහුණ දී සිටී. බැලස්ටික් මිසයිල වැනි ප්රබල ප්රහාර හඳුනාගැනීමට ඊශ්රායලය සතු තාක්ෂණය සමත් වුවද, ඉතා සෙමින් සහ පහළ මට්ටමකින් පියාසර කරන මෙම කුඩා ඩ්රෝන යානා රේඩාර් පද්ධතිවලට හසුකර ගැනීම සහ විනාශ කිරීම අතිශය සංකීර්ණ කාර්යයක් බවට පත්ව ඇත. පෙබරවාරි 28 වැනිදා ආරම්භ වූ යුද ගැටුම්වල සිට මේ දක්වා ඉරානය විසින් ඊශ්රායලය වෙත ඩ්රෝන යානා 550ක් පමණ දියත් කර ඇති අතර, ඒවායේ ගමන් පථය කලින් පුරෝකථනය කිරීමට අපහසු වීම නිසා ආරක්ෂක පද්ධති මඟහැර යාමේ හැකියාව ඉහළ ගොස් තිබේ.
මෙම තර්ජනයට මුහුණ දීම සඳහා ඊශ්රායලය ‘අයන් ඩෝම්’ (Iron Dome) සහ ‘ඩේවිඩ්ස් ස්ලින්ග්’ (David’s Sling) වැනි ස්ථර කිහිපයකින් යුත් ආරක්ෂක ජාලයක් භාවිතා කරන අතර, 2025 අගභාගයේදී හඳුන්වා දුන් ‘අයන් බීම්’ (Iron Beam) නමැති අධි බලැති ලේසර් තාක්ෂණය ද මේ සඳහා යොදා ගනී. ඉරාන තාක්ෂණය සහිත ‘ෂාහෙඩ්’ (Shahed) වැනි ඩ්රෝන යානයක පිරිවැය ඇමෙරිකානු ඩොලර් 20,000ත් 50,000ත් අතර ඉතා අඩු අගයක් ගන්නා බැවින්, ඒවා විශාල වශයෙන් දියත් කර ඊශ්රායලයේ මිල අධික ආරක්ෂක මිසයිල පද්ධති වෙහෙසට පත් කිරීමේ (Attrition) උපක්රමයක් මෙහිදී ක්රියාත්මක වේ. යුක්රේන-රුසියානු යුද්ධයේ අත්දැකීම් ද සැළකිල්ලට ගනිමින්, ශබ්දය මඟින් ඩ්රෝන හඳුනාගැනීමේ තාක්ෂණය ලබා ගැනීමට ඊශ්රායල අගමැති බෙන්ජමින් නෙතන්යාහු මහතා යුක්රේනයේ සහාය අපේක්ෂා කරන බව ද වාර්තා වේ.
