ඊශ්රායල අග්රාමාත්ය බෙන්ජමින් නෙතන්යාහුගේ සමීපතම උපදේශකයෙකු වන ප්රකට ව්යාපාරික මයිකල් අයිසන්බර්ග් (Michael Eisenberg), ඊශ්රායල ආරක්ෂක අමාත්යවරයා සහ බුද්ධි අංශ ප්රධානීන් සමඟ එක්ව ඉරානයට එරෙහි යුද මෙහෙයුම් සැලසුම් කිරීමේ මණ්ඩලයට එක්වී සිටින බව විදෙස් මාධ්ය වාර්තා කරයි. මීට පෙර ගාසා මානුෂීය පදනම (Gaza Humanitarian Foundation) සහ සාම මණ්ඩලය (Board of Peace) වැනි ආයතනවල ප්රධාන භූමිකාවක් ඉටු කළ ඔහු, මානුෂීය කටයුතුවල සිට සෘජු යුදමය තීරණ ගන්නා මට්ටම දක්වා පැමිණීම විශේෂත්වයකි. ඊශ්රායල අග්රාමාත්යවරයාගේ විශේෂ නියෝජිතයා ලෙස ද කටයුතු කරන අයිසන්බර්ග්, ඇමරිකානු හමුදාව මෙහෙයවන සිවිල්-හමුදා සම්බන්ධීකරණ මධ්යස්ථානයේ (CMCC) ද ප්රධාන සාමාජිකයෙකු ලෙස කටයුතු කරයි.
කෙසේ වෙතත්, අයිසන්බර්ග්ගේ මෙම පත්වීම සම්බන්ධයෙන් ඊශ්රායලය තුළ දේශපාලනික සහ නීතිමය මතභේදයක් හටගෙන තිබේ. ඔහු සිය පෞද්ගලික ව්යාපාරික අවශ්යතා සහ රාජ්ය ආරක්ෂක වගකීම් අතර පැවතිය හැකි “අභිලාෂයන් අතර ගැටුම” (Conflict of Interest) කළමනාකරණය කිරීම සඳහා මෙතෙක් නිල නීතිමය එකඟතාවයකට එළඹ නොමැති බව Ynet පුවත් සේවය පෙන්වා දෙයි. යුදමය තීරණ ගන්නා ඉහළම මණ්ඩලයකට මෙලෙස සිවිල් ව්යාපාරිකයෙකු සම්බන්ධ කර ගැනීම හමුදාමය ස්වාධීනත්වයට බාධාවක් විය හැකි බවට ඇතැම් ආරක්ෂක අංශ විවේචන එල්ල කළද, අග්රාමාත්ය කාර්යාලය පවසන්නේ ඔහුගේ ව්යාපාරික අත්දැකීම් සහ තාක්ෂණික දැනුම වර්තමාන නවීන යුධ මෙහෙයුම් සඳහා අත්යවශ්ය වන බවයි.
