ඉතාලියේ ජීවත් වන ශ්රී ලාංකික ප්රජාව මුහුණ දෙන ගැටලු සඳහා නොමිලේ සහන සේවා සැපයීමේ අරමුණින් ශෂී වර්ණකුලසූරිය මහත්මිය විසින් ආරම්භ කරන ලද “හෙල්පින් හැන්ඩ්ස්” පදනමේ සමාරම්භක උළෙල පසුගිය මාර්තු 15 වනදා ඉතාලියේදී උත්කර්ෂවත් අන්දමින් පැවැත්විණි. මෙම අවස්ථාවට ඉතාලියේ වෙසෙන ලාංකිකයන් 350කට අධික පිරිසක් සහභාගී වී සිටියහ.
ඉතාලියේ රැඳී සිටින නීත්යනුකූල මෙන්ම නීත්යනුකූල නොවන ශ්රී ලාංකිකයන්ට අවශ්ය නීතිමය උපදෙස් සහ මඟපෙන්වීම් ලබා දීම මෙහි ප්රධානතම කාර්යයකි. පදිංචිය තහවුරු කරගැනීමේ බලපත්ර (Permit) සහ අනෙකුත් සංක්රමණික ලේඛන සම්බන්ධව පවතින ගැටලුවලට සහාය වීම මෙහිදී සිදු කෙරේ. විවිධ රාජ්ය ආයතන සමඟ ගනුදෙනු කිරීමේදී අවශ්ය වන උපදේශන සේවාවන් සහ ලිපිලේඛන සකස් කිරීමේ සහාය ද මෙමගින් නොමිලේ සපයනු ලැබේ.
මීට අමතරව, ඉතාලිය තුළ ජීවත් වීමේදී අවශ්ය වන අනෙකුත් අත්යවශ්ය සේවා සහ පහසුකම් ලබාගන්නා ආකාරය පිළිබඳව ද මෙම පදනම හරහා මඟපෙන්වීම් සිදු කරයි. විදේශගතව සිටින ලාංකිකයන්ගේ සුබසාධනය වෙනුවෙන් මෙවැනි ස්වේච්ඡා සංවිධානයක් පිහිටුවීම ඉතාලියේ වෙසෙන ලාංකික ප්රජාවගේ පැසසුමට ලක්ව ඇත.
