යාපනය මණ්ඩතිව් දූපතේ පිහිටි සුවිශේෂී තෙත්බිම් පද්ධතියක් විනාශ කරමින් ඉදි කිරීමට යෝජිත ජාත්යන්තර ක්රිකට් ක්රීඩාංගනය සහ ක්රීඩා නගර ව්යාපෘතියේ කටයුතු කිසිදු පාරිසරික අනුමැතියකින් තොරව නීති විරෝධී ලෙස ආරම්භ කර ඇති බව වාර්තා වේ. ක්රීඩා අමාත්ය සුනිල් කුමාර ගමගේ මහතාගේ ආරාධනයෙන්, ජනාධිපති අනුර කුමාර දිසානායක මහතා විසින් පසුගිය සැප්තැම්බර් 01 වන දින මුල්ගල තබන ලද මෙම ව්යාපෘතිය යටතේ, දැනටමත් අක්කර 138ක තෙත්බිම් ප්රමාණයක් ගොඩකිරීම සහ කම්බි වැටවල් යොදා වෙන් කිරීම ශ්රී ලංකා ක්රිකට් ආයතනය විසින් සිදු කරමින් පවතී. ජාතික පාරිසරික පනත දරුණු ලෙස උල්ලංඝනය කරමින් සිදුවන මෙම ක්රියාව හමුවේ මධ්යම පරිසර අධිකාරිය සහ පරිසර අමාත්යාංශය දක්වන නිහඬතාව මෙරට නීතියේ ආධිපත්යය බරපතල අභියෝගයකට ලක් කිරීමක් බව පරිසරවේදීහු පෙන්වා දෙති.
මෙම දැවැන්ත ව්යාපෘතිය යටතේ ක්රිකට් ක්රීඩාංගනයට අමතරව ගොල්ෆ් ක්රීඩාංගනයක්, නිවාස සහ හෝටල් සංකීර්ණ ඉදි කිරීමට සැලසුම් කර ඇති අතර, එමඟින් මණ්ඩතිව් තෙත්බිම් පද්ධතිය සම්පූර්ණයෙන් විනාශ වීමේ අවදානමක් පවතී. මෙම පාරිසරික විනාශය හේතුවෙන් යාපනය කලපුව ආශ්රිත සුළු පන්න ධීවර කර්මාන්තය සම්පූර්ණයෙන් බිඳ වැටීමට නියමිත අතර, එය ප්රාදේශීය ධීවර ප්රජාවගේ ජීවනෝපායට එල්ල වන මරු පහරකි. එපමණක් නොව, දැනටමත් ජල අර්බුදයකින් පීඩා විඳින යාපනයේ ජනතාවගේ ජල අයිතිය ද මෙමඟින් තර්ජනයට ලක් වේ. ගොල්ෆ් සහ ක්රිකට් ක්රීඩාංගන නඩත්තුව සඳහා අධික ජල ප්රමාණයක් වැය කිරීමට සිදුවීම තුළින් ප්රදේශයේ පානීය ජල මූලාශ්ර සිඳී යාමේ තත්ත්වයක් උද්ගත විය හැකි බවට විද්වත්හු අනතුරු අඟවති. සංවර්ධනයේ නාමයෙන් සිදුවන මෙම පාරිසරික සහ සමාජීය බලපෑම සම්බන්ධයෙන් සිවිල් සංවිධාන සිය දැඩි විරෝධය පළ කර සිටියි.
