යාපනය කච්චතිව් දූපතේ පිහිටි ඓතිහාසික ශාන්ත අන්තෝනි දෙව්මැදුරේ වාර්ෂික මංගල්යය මෙවර අතිවිශාල බැතිමතුන් පිරිසකගේ සහභාගීත්වයෙන් ඉතා සාර්ථකව පවත්වා තිබේ. පෙබරවාරි 27 වනදා ආරම්භ වූ මෙම උත්සවයේ ප්රධාන දිව්ය පූජා යාගය අද (28) පෙරවරුවේ යාපනය රදගුරු ජෙබරත්නම් ජස්ටින් ඥානප්රගාසම් හිමිපාණන්ගේ ප්රධානත්වයෙන් පැවැත්විණි.
මෙවර මංගල්යයේ කැපී පෙනෙන ලක්ෂණය වූයේ බැතිමතුන්ගේ සහභාගීත්වය ඉහළ යාමයි. පසුගිය වසරේ බැතිමතුන් 8,000ක් සහභාගී වූ අතර මෙවර එම සංඛ්යාව 13,800 දක්වා වර්ධනය වී තිබේ. විශේෂයෙන්ම මෙවර ඉන්දීය බැතිමතුන්ට වඩා දේශීය බැතිමතුන්ගේ සහභාගීත්වය වැඩි වූ අතර, 9,000කට අධික ශ්රී ලාංකික බැතිමතුන් පිරිසක් මීට එක්ව සිටියහ.
මෙම අවස්ථාවට අමාත්ය රාමලිංගම් චන්ද්රසේකරන් මහතා සහ ශ්රී ලංකා නාවික හමුදාපති වයිස් අද්මිරාල් කාංචන බානගොඩ මහතා ඇතුළු සම්භාවනීය අමුත්තන් පිරිසක් සහභාගී වූහ. එහිදී අදහස් දැක්වූ පූජකතුමන් සහ අමාත්යවරයා අවධාරණය කළේ කච්චතිව් දූපතේ අයිතිය සම්බන්ධයෙන් පවතින ස්ථාවරයයි. 1974 වසරේ සිට මෙම දූපතේ අයිතිය ශ්රී ලංකාව සතු වන අතර, එය කිසිදු පාර්ශවයකට පවරා නොදෙන බව අමාත්යවරයා මෙහිදී සහතික විය.
දේශීය මාධ්ය ආයතන 40ක් සහ ඉන්දීය මාධ්ය ආයතන 20ක් මගින් මෙම උත්සවය සජීවීව ආවරණය කළ අතර, පැමිණි සියලු බැතිමතුන් වෙනුවෙන් නාවික හමුදාව විසින් අවශ්ය යටිතල පහසුකම් සලසා දී තිබුණි. දෙරටේම බැතිමතුන්ගේ සහජීවනය විදහාපාමින් නිමාවට පත් වූ මෙම මංගල්යය, ඉන්දු-ලංකා සබඳතාවල තවත් සුවිශේෂී සන්ධිස්ථානයක් සනිටුහන් කළේය.
