2026 වසරේ ජනවාරි මාසය සඳහා මෙරට සමස්ත අපනයන ආදායම එක්සත් ජනපද ඩොලර් මිලියන 1,532.57 ක් ලෙස සටහන් වී ඇති අතර මෙය 2025 වසරේ ජනවාරි මාසයේ වාර්තා වූ ඩොලර් මිලියන 1,347.79 ක ආදායම හා සැසඳීමේදී සියයට 13.71 ක කැපී පෙනෙන වර්ධනයක් බව ශ්රී ලංකා අපනයන සංවර්ධන මණ්ඩලය (EDB) නිල වශයෙන් නිවේදනය කරයි. ඊයේ (24) පැවති මාධ්ය හමුවකදී මේ පිළිබඳ අදහස් දැක්වූ EDB සභාපති මංගල විජේසිංහ මහතා සඳහන් කළේ 2030 වන විට මෙරට අපනයන ආර්ථිකය ඩොලර් බිලියන 36 ක් දක්වා ඉහළ නැංවීමට සහ ඒක පුද්ගල අපනයන ආදායම ඩොලර් 1500 ක මට්ටමකට ගෙන ඒමට රජය අපේක්ෂා කරන බවයි. මෙම කාලසීමාව තුළ තේ, පොල්, රබර් සහ විදුලි හා ඉලෙක්ට්රොනික උපාංග අපනයන ආදායම් සැලකිය යුතු ලෙස ඉහළ ගොස් ඇති අතර ඇඟලුම්, කුළුබඩු සහ මැණික් ක්ෂේත්රවල ආදායම්හි යම් පසුබෑමක් වාර්තා වී තිබේ. විශේෂයෙන්ම දිට්වා සුළි කුණාටුව හේතුවෙන් ඇති වූ නැව්ගත කිරීමේ ප්රමාදයන් කුළුබඩු අපනයනයට බලපා ඇති නමුත් ඇමරිකානු වෙළෙඳපොළේ තීරු බදු අඩු වීම සහ එක්සත් රාජධානියේ නව සහන ප්රතිපත්ති හේතුවෙන් ඉදිරි මාසවලදී අපනයන ක්ෂේත්රයේ තවදුරටත් වර්ධනයක් අපේක්ෂා කෙරේ. ජපානය සමඟ අත්සන් කරන ලද ආර්ථික කොරිඩෝ එකඟතාවය හරහා ජපාන සමාගම් ලංකාවේ නිෂ්පාදන ආරම්භ කොට ජාත්යන්තරයට අපනයනය කිරීමෙන් ආර්ථිකයට ලැබෙන වාසිය ඉහළ යන අතර ජාතික අපනයන සංවර්ධන සැලැස්ම එළඹෙන මාර්තු මාසයේදී එළිදැක්වීමට ද නියමිතය.
