ජපානයේ හකුබා නිම්නයේ පිහිටි හිම මත ලිස්සා යාමේ ක්රීඩා නිකේතනයකදී (Ski Resort) සිදු වූ හිම රිය (Snowmobile) අනතුරකින් 8 හැවිරිදි ඕස්ට්රේලියානු දැරියක වන ක්ලෝයි ජෙෆ්රිස් ජීවිතක්ෂයට පත්ව තිබේ. ඕස්ට්රේලියාවේ ගෝල්ඩ් කෝස්ට් ප්රදේශයේ පදිංචි මෙම දැරිය සිය මව සමඟ හිම රියක ගමන් කරමින් සිටියදී, එය මාර්ගයෙන් ඉවතට පැන පෙරළී යාමෙන් දැරිය රථයට යට වී බරපතළ තුවාල ලබා ඇති බව වාර්තා වේ. වහාම ක්රියාත්මක වූ සහන සේවකයින් ඇයව ගුවන් මගින් රෝහල් ගත කළ ද, ප්රතිකාර ලබමින් සිටියදී ඇය මියගිය බව ජපන් බලධාරීන් තහවුරු කරයි.
මෙම අනතුර සිදු වූ අවස්ථාවේ සංචාරක මඟපෙන්වන්නන් තිදෙනෙකු ඇතුළු හිම රිය නවයක් එම සංචාරයට එක්ව සිට ඇති අතර, වනාන්තර සහිත මාර්ගයක වංගුවක් ගැනීමේදී මෙම අවාසනාවන්ත සිදුවීම සිදුව ඇත. අනතුරත් සමඟ අදාළ සංචාරක සමාගම සියලුම හිම මත ක්රීඩා සංචාර තාවකාලිකව නතර කර ඇති අතර ආරක්ෂක විධිවිධාන පිළිබඳ විශේෂ විමර්ශනයක් ද ආරම්භ කර තිබේ. විශේෂයෙන්ම මෙම වසරේ මුල් මාස කිහිපය තුළ ජපානයේ හිම ක්රීඩා නිකේතන ආශ්රිතව මියගිය සිව්වන ඕස්ට්රේලියානු ජාතිකයා ක්ලෝයි වීම හේතුවෙන් සංචාරකයින්ගේ ආරක්ෂාව පිළිබඳව ජාත්යන්තර වශයෙන් දැඩි කතාබහක් නිර්මාණය වී ඇත.
