ඉන්දියාවේ මධ්යම රජය යටතේ පාලනය වන නේවාසික පාසල් පද්ධතියක් වන ජවහර් නවෝදය විද්යාලවල (JNV) 2021 වසරේ සිට මේ දක්වා කාලය තුළ ශිෂ්ය සියදිවි හානිකර ගැනීම් 40ක් වාර්තා වී ඇති බව මධ්යම රජය ඊයේ (30) ලෝක් සභාවට (Lok Sabha) දැනුම් දුන්නේය. මෙහිදී වැඩිම මරණ සංඛ්යාවක් ජාර්කන්ඩ් (Jharkhand) සහ මධ්ය ප්රදේශ් (Madhya Pradesh) ප්රාන්තවලින් වාර්තා වී ඇති අතර එම සංඛ්යාව 5 බැගින් වේ. බිහාර්, කර්නාටක, කේරළ, රාජස්ථාන් සහ උත්තර ප්රදේශ් යන ප්රාන්තවලින් මරණ 3 බැගින් වාර්තා වී ඇත.
අධ්යාපන රාජ්ය අමාත්ය ජයන්ත් චෞද්රි (Jayant Chaudhary) ප්රකාශ කළේ, 2021 වසරේදී වාර්තා වූ මරණ 2ක සංඛ්යාව 2024 වසර වන විට 12ක් දක්වා ඉහළ ගොස් ඇති බවයි. මෙම මරණ සම්බන්ධයෙන් සිදුකළ විමර්ශනවලදී හෙළි වී ඇත්තේ පවුල් ප්රශ්න, විභාග සහ අධ්යාපනික පීඩනය, දෙමාපියන්ගේ අධික බලාපොරොත්තු, නව යොවුන් වියේ චර්යාත්මක ගැටලු සහ මානසික සෞඛ්ය ගැටලු මෙම සියදිවි හානිකර ගැනීම්වලට ප්රධාන හේතු වී ඇති බවයි.
දමිළ නාඩුව හැර ඉන්දියාව පුරා ක්රියාත්මක වන මෙම පාසල් පද්ධතිය යටතේ විද්යාල 650කට අධික සංඛ්යාවක් පවතින අතර සිසුන් ලක්ෂ 3.10කට වැඩි පිරිසක් එහි අධ්යාපනය ලබති. මෙම තත්ත්වය පාලනය කිරීම සඳහා විධිමත් උපදේශන සේවා සහ මානසික සෞඛ්ය වැඩසටහන් ක්රියාත්මක කිරීමට පියවර ගන්නා බව ද අමාත්යවරයා වැඩිදුරටත් සඳහන් කළේය.
