බන්ධනාගාරවල පවතින දැඩි තදබදයට පිළියමක් ලෙස සැකකරුවන් රක්ෂිත බන්ධනාගාරගත කිරීම වෙනුවට නිවාස අඩස්සියේ (House Arrest) තැබීමට හැකි වන පරිදි නව පනතක් හඳුන්වා දෙන බව අධිකරණ හා ජාතික ඒකාබද්ධතා අමාත්ය නීතිඥ හර්ෂණ නානායක්කාර මහතා පවසයි. අද (19) රජයේ ප්රවෘත්ති දෙපාර්තමේන්තුවේ පැවති සාකච්ඡාවකදී අමාත්යවරයා පෙන්වා දුන්නේ, මෙරට බන්ධනාගාර ධාරිතාව 10,500ක් වුවද මේ වන විට පුද්ගලයන් 39,000ක් රඳවා සිටින බවයි. ඉන් 28,000ක්ම තවමත් වරදකරුවන් නොවූ සැකකරුවන් වන අතර ඔවුන්ගෙන් වැඩි පිරිසක් මත්ද්රව්යවලට ඇබ්බැහි වූවන් බව ද හෙළි විය.
විනිසුරු යසන්ත කෝදාගොඩ මහතාගේ මූලිකත්වයෙන් සකස් කෙරෙන මෙම නව පනත හරහා සැකකරුවන් නිවෙස්වල රඳවා නිරීක්ෂණය කිරීමට අවස්ථාව ලැබෙනු ඇත. මීට අමතරව, මරණීය දණ්ඩනය සහ ජීවිතාන්තය දක්වා සිරදඬුවම් විඳින රැඳවියන්ගේ දඬුවම් කාලය ලිහිල් කිරීමේ ක්රමවේදයක් සකස් කිරීමට විනිසුරු තුරෙයි රාජා මහතාගේ ප්රධානත්වයෙන් කමිටුවක් පත් කර ඇති බව ද අමාත්යවරයා සඳහන් කළේය. එසේම, මහජන විරෝධය සැලකිල්ලට ගනිමින් මතභේදයට තුඩු දුන් ‘කුලී ගෙවල් පනත’ (Rent Act) පවතින ආකාරයෙන් නීතිගත නොකරන බවත්, මහජන අදහස් විමසීමෙන් පසු එය සංශෝධනය කරන බවත් ඔහු සහතික විය.
