මාතර කොටවිල අධිකරණ සංකීර්ණයේ පවතින යටිතල පහසුකම් සහ පරිපාලනමය ගැටලු පිළිබඳව සොයා බලා ඒවාට කඩිනම් විසඳුම් ලබාදීමේ විශේෂ සාකච්ඡාවක් අධිකරණ සහ ජාතික ඒකාබද්ධතා අමාත්ය, නීතිඥ හර්ෂණ නානායක්කාර මහතාගේ ප්රධානත්වයෙන් ඊයේ (26) පස්වරුවේ එම පරිශ්රයේදී පැවැත්විණි. මාතර නීතිඥ සංගමයේ නිලධාරීන් සමඟ පැවැති මෙම සාකච්ඡාවේදී අධිකරණ පද්ධතියේ කාර්යක්ෂමතාව ඉහළ නැංවීම සඳහා අවශ්ය මූලික අවශ්යතා රැසක් කෙරෙහි අවධානය යොමු විය. විශේෂයෙන් මහෙස්ත්රාත් අධිකරණ පහසුකම් පුළුල් කිරීම, සම්මන්ත්රණ ශාලාව නවීකරණය කිරීම, කාර්ය මණ්ඩල පුරප්පාඩු පිරවීම සහ සහතික පිටපත් ලබාගැනීම සඳහා අවශ්ය තාක්ෂණික උපකරණ ලබාදීම පිළිබඳව මෙහිදී දීර්ඝ වශයෙන් කරුණු විමසා බැලිණි.
අධිකරණ සංකීර්ණය වෙත පැමිණෙන සේවාදායක ජනතාවගේ පහසුව වෙනුවෙන් ස්වයංක්රිය බැංකු (ATM) පහසුකම් ස්ථාපිත කිරීම සහ නීතිඥ කාර්යාල සඳහා පවතින ඉඩම් ගැටලු නිරවුල් කිරීම සම්බන්ධයෙන් ද අමාත්යවරයාගේ අවධානය යොමු වූ අතර, ඔහු නීතිඥ කාර්යාල සංකීර්ණයේ පවතින තත්ත්වය පිළිබඳව සොයා බැලීම සඳහා නිරීක්ෂණ චාරිකාවක ද නිරත විය. මෙම අවස්ථාවට මාතර නගරාධිපති නීතිඥ ජයන්ත පතිරණ, වැලිගම ප්රාදේශීය සභාවේ සභාපති නීතිඥ චින්තක හේවා පතිරණ සහ මාතර නීතිඥ සංගමයේ සභාපති නීතිඥ කීර්ති ධනුෂ්ක ජයසිංහ යන මහත්වරුන් ඇතුළු ජ්යෙෂ්ඨ නීතිඥවරුන් සහ අමාත්යාංශයේ උසස් නිලධාරීන් පිරිසක් සහභාගී වී සිටියහ.
