ජනතා විමුක්ති පෙරමුණ (JVP) රාජ්ය දේපළ අවභාවිත කරන බවට චෝදනා කරමින් එම පක්ෂයට එරෙහිව අල්ලස් හෝ දූෂණ චෝදනා විමර්ශන කොමිසමට පැමිණිලි කරන බව නව ජනතා පෙරමුණේ නායක සුගීෂ්වර බණ්ඩාර මහතා පවසයි. ඊයේ (08) දින පැලවත්තේ පිහිටි ජවිපෙ ප්රධාන කාර්යාලය වෙත ගිය අවස්ථාවේදී තමන්ට මුහුණ දීමට සිදු වූ සිදුවීමක් පදනම් කරගනිමින් ඔහු මෙම තීරණය ගෙන තිබේ.
සුගීෂ්වර බණ්ඩාර මහතා ඇතුළු පිරිස ජවිපෙ ප්රධාන ලේකම් ටිල්වින් සිල්වා මහතා හමුවී ලිපියක් භාරදීමට ගිය අවස්ථාවේදී, පොලිස් නිලධාරීන් 200කට අධික පිරිසක් සහ විශේෂ කාර්ය බලකායේ (STF) නිලධාරීන් යොදවා දැඩි රැකවල් මැද තමන්ට බාධා කළ බව ඔහු පෙන්වා දෙයි. පක්ෂයේ ප්රධානීන් හෝ රජයේ වගකිවයුතු අමාත්යවරයෙකු පවා නොමැති අවස්ථාවක, පෞද්ගලික දේශපාලන පක්ෂ කාර්යාලයකට මෙවැනි දැවැන්ත රාජ්ය ආරක්ෂාවක් සැපයීම රාජ්ය සම්පත් අවභාවිතයක් බව ඔහුගේ තර්කයයි.
මෙලෙස කිසිදු පදනමකින් තොරව පොලිස් නිලධාරීන් යෙදවීමට මැදිහත් වූයේ කවුරුන්දැයි ආණ්ඩුව රටට හෙළි කළ යුතු බවත්, මෙම සිදුවීම හරහා ජනතා විමුක්ති පෙරමුණ රාජ්ය බලය අනිසි ලෙස භාවිතා කරන ආකාරය පැහැදිලි වන බවත් ඔහු වැඩිදුරටත් ප්රකාශ කළේය.
