උතුරු කොරියානු නායක කිම් ජොන් අන් සිය අනුප්රාප්තිකයා ලෙස 13 හැවිරිදි සිය දියණිය වන කිම් ජූ-ඒ (Kim Ju-ae) නම් කිරීමත් සමඟ, ඔහුගේ පවුල තුළ දරුණු බල අරගලයක් ආරම්භ විය හැකි බවට බුද්ධි අංශ ප්රධානීන් අනතුරු අඟවයි. දකුණු කොරියානු බුද්ධි අංශ වාර්තාවලට අනුව, කිම් ජොන් අන්ගෙන් පසුව පාලනය භාර ගැනීමට ඔහුගේ දියණිය පුහුණු වෙමින් සිටියද, කිම්ගේ බලකාමී සහ රුදුරු සහෝදරිය වන කිම් යෝ-ජොන් (Kim Yo-jong) මෙම තීරණයට ප්රබල අභියෝගයක් වනු ඇති බව විශ්වාස කෙරේ. දැනට 38 වැනි වියේ පසුවන කිම් යෝ-ජොන්, උතුරු කොරියාවේ දෙවැනි බලවත්ම පුද්ගලයා ලෙස සැලකෙන අතර හමුදාවේ සහ පක්ෂයේ ප්රබල සහයෝගයක් ඇයට හිමිව පවතී.
දශක ගණනාවක් පුරා සිය දේශපාලන ප්රතිවාදීන් සහ පවුලේ සාමාජිකයන් පවා ඝාතනය කරමින් බලය රැකගත් “කිම් පරම්පරාවේ” ඉතිහාසය දෙස බලන විට, මෙම බල අරගලය ලේ වැකි එකක් විය හැකි බව දකුණු කොරියානු හිටපු බුද්ධි නිලධාරී රා ජොන්-යිල් පෙන්වා දෙයි. කිම් ජොන් අන් 2011 දී බලයට පත්වීමෙන් පසුව සිය මාමණ්ඩිය වූ ජැං සොං-තේක් මරා දැමීමට නියෝග කළ අතර, 2017 දී මැලේසියාවේ ගුවන්තොටුපළකදී සිය අර්ධ සහෝදරයා වූ කිම් ජොන්-නම් විෂ වායුවක් ආධාරයෙන් ඝාතනය කළ බවට ද චෝදනා එල්ල විය. එවැනි පසුබිමක, තම දියණියගේ අනාගතය වෙනුවෙන් කිම් ජොන් අන් ගන්නා පියවර සහ එයට ඔහුගේ සහෝදරිය දක්වන ප්රතිචාරය ලෝක දේශපාලනයේ දැඩි අවධානයට ලක්ව තිබේ.
මෑතකදී උතුරු කොරියාවේ පැවති මිසයිල අත්හදා බැලීම් සහ ප්රධාන යුද හමුදා සංදර්ශනවලදී කිම් ජූ-ඒ සිය පියා අසල නිතර පෙනී සිටීම ඇයව පාලනය සඳහා සූදානම් කරන බවට පැහැදිලි සලකුණක් වුවද, කිම් යෝ-ජොන් සතු දේශපාලන අත්දැකීම් හමුවේ 13 හැවිරිදි දැරියකට සිය බලය තහවුරු කර ගැනීම අසීරු වනු ඇති බව විචාරකයෝ පවසති. මෙම පවුල් ආරවුල උතුරු කොරියාවේ අභ්යන්තර ස්ථාවරත්වයට මෙන්ම කලාපීය ආරක්ෂාවට ද සෘජුව බලපානු ඇත.
