එඩේරමුල්ල පොලිස් ස්ථානයේ සේවය කළ හිටපු ස්ථානාධිපතිවරයා ඇතුළු නිලධාරීන් සිවුදෙනෙකුට හිමිවිය යුතු පොලිස් ත්යාග මුදල් එම පොලිසියේම නිලධාරීන් තිදෙනෙකු විසින් වංචාසහගත ලෙස ලබාගෙන ඇති බවට පොලිස්පතිවරයා වෙත පැමිණිල්ලක් ඉදිරිපත් වී තිබේ. දැනට කෑගල්ල පොලිස් කොට්ඨාසයේ සේවය කරන ප්රධාන පොලිස් පරීක්ෂකවරයෙකු විසින් මෙම පැමිණිල්ල සිදුකර ඇති අතර, රුපියල් 16,000කට අධික ත්යාග මුදලක් මෙලෙස වංචා කර ඇති බව සඳහන් වේ.
පැමිණිල්ලට අනුව, පසුගිය වසරේ දෙසැම්බර් 15 වැනිදා ලැබුණු වවුචර 200කින් සමන්විත ත්යාග මුදල් බණ්ඩල අටක තොරතුරු පරීක්ෂා කිරීමේදී, ස්ථාන මාරුවීම් ලැබූ නිලධාරීන් සිවුදෙනෙකුට එම මුදල් ගෙවූ බවට ව්යාජ සටහන් යොදා ඇති බව අනාවරණය වී ඇත. සාමාන්ය ක්රමවේදය අනුව ස්ථාන මාරුවීම් ලැබූ නිලධාරීන්ට අදාළ ත්යාග මුදල් ලබාගැනීම සඳහා ඔවුන්ගේ වත්මන් සේවා ස්ථාන වෙත පණිවුඩ එවිය යුතු වුවද, මාස තුනක් ගතවන තුරුත් එවැනි කිසිදු දැනුම්දීමක් සිදුකර නොමැති බව පැමිණිලිකරු පෙන්වා දෙයි.
මෙම වංචාව පිළිබඳව තොරතුරු අනාවරණය වී ඇත්තේ අදාළ ප්රධාන පොලිස් පරීක්ෂකවරයා පෞද්ගලික අවශ්යතාවක් සඳහා කැලණිය පොලිස් අධිකාරී කාර්යාලයට පැමිණි අවස්ථාවකදීය. මේ සම්බන්ධයෙන් බස්නාහිර උතුර භාර නියෝජ්ය පොලිස්පතිවරයා යටතේ විශේෂ විමර්ශනයක් ආරම්භ කර ඇති අතර, වංචාවට සම්බන්ධ නිලධාරීන්ට එරෙහිව විනයානුකූල පියවර ගැනීමට නියමිතය.
