කේරළ ප්රාන්ත රජයේ සේවකයන්, ගුරුවරුන් සහ විශ්රාමිකයන් සඳහා ලබාදෙන ජීවන වියදම් දීමනාව (Dearness Allowance – DA) සියයට 25 සිට 35 දක්වා ඉහළ නැංවීමට එරට රජය අද (20) තීරණය කළේය. මෙම තීරණය අනුව ප්රාන්ත රජයේ සහ පළාත් පාලන ආයතනවල සේවකයන්ට මෙන්ම රජයේ ආධාර ලබන පාසල්, විද්යාල සහ පොලිටෙක්නික් ආයතනවල කාර්ය මණ්ඩලයට ද මෙම සහනය හිමි වේ. වැඩි කරන ලද දීමනාව මාර්තු මස වැටුප සමඟ ගෙවීමට නියමිත අතර විශ්රාමිකයන් සඳහා වන දීමනාව අප්රේල් මස විශ්රාම වැටුප සමඟ ගෙවීමට රජය පියවර ගෙන ඇත.
මෙම දීමනා වැඩිවීම පූර්ණකාලීන සේවකයන්ට පමණක් නොව අර්ධකාලීන ගුරුවරුන් සහ සේවකයන්ට ද අදාළ වන පරිදි සකස් කර තිබේ. එසේම ප්රාන්ත රජයේ දීමනා රටාව අනුගමනය කරන ස්වයං පාලන ආයතන සහ මණ්ඩලවලට ද සිය මූල්ය ශක්තිය මත මෙම දීමනාව ලබා දිය හැකි අතර ඒ සඳහා පාලක මණ්ඩලවල අනුමැතිය අවශ්ය වේ. කෙසේ වෙතත්, කේරළ විදුලිබල මණ්ඩලය සහ මාර්ග ප්රවාහන සංස්ථාව සඳහා මෙම නියෝගය අදාළ නොවන අතර ඔවුන් විසින් ඉදිරියේදී ඒ සඳහා වෙනම නියෝග නිකුත් කරනු ඇත.
