දශකයකට ආසන්න කාලයක් ලිංගික අපරාධ චෝදනාවලට මුහුණ දෙමින් සිටින ඔස්කාර් සම්මානලාභී නළු කෙවින් ස්පේසි, තමන්ට එරෙහිව ලන්ඩන් මහාධිකරණයේ ගොනු කර තිබූ සිවිල් නඩු තුනක් සමථයකට පත් කර ගැනීමට සමත් වී ඇත. 2000 සහ 2013 අතර කාලය තුළ සිදුවූ බව කියන ලිංගික අතවර සම්බන්ධයෙන් පුද්ගලයන් තිදෙනෙකු විසින් පවරා තිබූ මෙම නඩු ලබන ඔක්තෝබර් මාසයේදී විභාග වීමට නියමිතව තිබුණි. එහෙත් මාර්තු 13 වනදා ඉදිරිපත් කළ අධිකරණ ලේඛනවලට අනුව, අනාවරණය නොකළ මුදලකට දෙපාර්ශවය එකඟ වීමෙන් පසු එම නඩු විභාග අවලංගු කර තිබේ.
මෙම චෝදනා එල්ල කළ පුද්ගලයන් දෙදෙනෙකු 2023 වසරේදී ස්පේසිට එරෙහිව පැවති අපරාධ නඩු විභාගයේදී ද සාක්ෂි ලබා දුන් අතර, එහිදී ඔහු සියලු චෝදනාවලින් නිදහස් කිරීමට ජූරි සභාව තීරණය කළේය. ස්පේසි දිගින් දිගටම පවසා සිටියේ තමන් කිසිදු වරදක් කර නොමැති බවත්, අදාළ සිදුවීම් සිදු නොවූ බව හෝ ඒවා දෙපාර්ශවයේම කැමැත්ත මත සිදුවූ දේවල් බවත්ය. 2017 වසරේදී ප්රථම වරට ඇන්තනි රැප් විසින් එල්ල කළ චෝදනාවෙන් පසු පුද්ගලයන් 15 දෙනෙකු පමණ ඔහුට එරෙහිව ඉදිරිපත් වූ අතර, ඒ හේතුවෙන් ඔහුට “House of Cards” වැනි ජනප්රිය නිර්මාණවලින් ඉවත් වීමට ද සිදු විය.
කෙවින් ස්පේසිට එරෙහිව පවරා තිබූ මෙම ප්රධාන නඩු කිහිපයක් මෙලෙස නිමාවට පත්වීම ඔහුගේ රංගන ජීවිතයට නැවත පණ දීමට ඉවහල් වනු ඇතැයි විචාරකයෝ පවසති. ඔහු දැනටමත් “The Awakening” නමැති අලුත් චිත්රපටයක රංගනයෙන් දායක වීමට සූදානමින් සිටින බව වාර්තා වේ. කෙසේ වෙතත්, මෙම සමථය සම්බන්ධයෙන් ස්පේසිගේ නීතිඥයින් හෝ චෝදනා ඉදිරිපත් කළ පාර්ශවය මෙතෙක් වැඩිදුර අදහස් දැක්වීමක් සිදු කර නොමැත.
