උතුරු කොරියාවේ ඉහළම ප්රතිපත්ති සම්පාදක සහ පාලක මණ්ඩලය වන “රාජ්ය කටයුතු කොමිසමේ” (State Affairs Commission) සභාපතිවරයා ලෙස කිම් ජොන්ග් උන් මහතා යළිත් වරක් තේරී පත් වූ බව එරට නිල පුවත් සේවය වන KCNA අද (23) වාර්තා කළේය. ඊයේ (22) පැවැති 15 වැනි උච්චතම මහජන මන්ත්රී මණ්ඩලයේ (Supreme People’s Assembly) පළමු සැසිවාරයේදී මෙම තීරණය ගෙන ඇති අතර, එය සමස්ත උතුරු කොරියානු ජනතාවගේ ඒකමතික කැමැත්ත සහ අභිලාෂය පිළිබිඹු කරන්නක් බව රජය පවසයි.
කෙසේ වෙතත්, උතුරු කොරියාවේ මැතිවරණ යනු පාලක පක්ෂයට ප්රජාතන්ත්රවාදී පෙනුමක් ලබා දීම සඳහා පවත්වනු ලබන පූර්ව නිගමනය කරන ලද සිදුවීම් මාලාවක් බව දේශපාලන විචාරකයෝ පෙන්වා දෙති. මෙවර මන්ත්රී මණ්ඩලයට සාමාජිකයන් 687 දෙනෙකු තේරී පත්ව ඇති අතර, එරට වයස අවුරුදු 17ට වැඩි ජනතාවට පාලක පක්ෂය විසින් ඉදිරිපත් කරන ලද එකම අපේක්ෂකයාට පක්ෂව හෝ විපක්ෂව ඡන්දය දීමට අවස්ථාව හිමි විය. නිල වාර්තාවලට අනුව 99.99%ක ඡන්ද දායකයින් පිරිසක් සහභාගී වී ඇති අතර ඉන් 99.93%ක්ම පක්ෂව ඡන්දය ප්රකාශ කර තිබේ.
මෙම සැසිවාරයේදී උතුරු කොරියානු ව්යවස්ථාවේ යම් සංශෝධන සිදු වීමට ඉඩ ඇති බව විශ්ලේෂකයෝ විශ්වාස කරති. විශේෂයෙන්ම දකුණු කොරියාව සමඟ පවතින සබඳතා “සතුරු රාජ්යයන් දෙකක්” ලෙස නිල වශයෙන් නම් කිරීමට සහ “ජාතික ඒකාබද්ධතාවය” වැනි වචන වෙනුවට “භූමි ප්රදේශය පාලනය කිරීම” වැනි ආක්රමණශීලී වචන භාවිත කිරීමට කිම් ජොන්ග් උන් මෙහිදී කටයුතු කරනු ඇතැයි අපේක්ෂා කෙරේ. කිම් ජොන්ග් උන් යනු 1948 දී සිය සීයා වන කිම් ඉල් සුං විසින් ආරම්භ කරන ලද මෙම න්යෂ්ටික අවි සහිත රාජ්යයේ තෙවැනි පරම්පරාවේ පාලකයා වන අතර ඔහු 2011 වසරේ සිට රට පාලනය කරයි.
