ලොව කාර්යබහුලම දුම්රිය ජාලයක් වන ඉන්දීය දුම්රිය සේවය ආධාරයෙන් රාජ නාගයන් (King Cobras) එරට විවිධ ප්රදේශ කරා සංක්රමණය වන බව නවතම පර්යේෂණයකින් හෙළි වී තිබේ. විශේෂයෙන්ම ඉන්දියාවේ බටහිර ඝාට්ස් කලාපයට ආවේණික, වඳවී යාමේ තර්ජනයට ලක්ව ඇති ‘Ophiophagus kaalinga’ නැමැති රාජ නාග විශේෂය, දුම්රිය මගින් සංචාරක පාරාදීසයක් වන ගෝවා ප්රදේශයේ වෙරළබඩ කලාප දක්වා ව්යාප්ත වෙමින් පවතින බව විද්යාඥයෝ පෙන්වා දෙති. සාමාන්යයෙන් වනාන්තර සහ ගංගා ආශ්රිත අභ්යන්තර ප්රදේශවල වෙසෙන මෙම සතුන්, තමන්ට කිසිසේත්ම වාසයට නුසුදුසු වෙරළබඩ දුම්රිය ස්ථාන අසලින් හමුවීම පර්යේෂකයන්ගේ මවිතයට හේතු වී ඇත.
2002 සිට 2024 දක්වා කාලය තුළ සර්ප ගලවා ගැනීමේ දත්ත සහ වාර්තා විශ්ලේෂණය කළ පර්යේෂකයන්ට අනුව, ගෝවා ප්රදේශයේ රාජ නාගයන් හමු වූ ස්ථාන 47න් 5ක්ම පිහිටා තිබුණේ අතිශය කාර්යබහුල දුම්රිය මංතීරු ආසන්නයේය. ස්මාර්ට් දුරකථන සහ සමාජ මාධ්ය භාවිතය ඉහළ යාමත් සමඟ දුම්රිය තුළ සහ ඒ අවට සර්පයන් සිටින අයුරු දැක්වෙන වීඩියෝ දර්ශන වාර්තා වීම ද මෑත කාලීනව ඉහළ ගොස් තිබේ. එක් දින 30ක කාල සීමාවක් තුළ පමණක් මෙවැනි සිදුවීම් තුනක් වාර්තා වී ඇති බව ‘Biotropica’ විද්යාත්මක සඟරාවේ පළ වූ මෙම අධ්යයනය සඳහන් කරයි.
මෙම අසාමාන්ය සංක්රමණයට හේතුව ලෙස විද්යාඥයන් සැක කරන්නේ භාණ්ඩ ප්රවාහන දුම්රිය තුළ සිටින මීයන් සහ අනෙකුත් කුඩා සර්පයන් ආහාරයට ගැනීමට රාජ නාගයන් පෙළඹීමයි. දුම්රිය මැදිරි තුළ ඇති ආරක්ෂිත සැඟවුණු ස්ථාන සහ අහඹු ලෙස දුම්රියට ගොඩවීම හේතුවෙන් මෙම සතුන් කිලෝමීටර් සිය ගණනක් ඈතට ප්රවාහනය වේ. දුම්රිය මාර්ග යනු හුදෙක් සතුන්ට ගමන් කළ හැකි මංතීරු පමණක් නොව, ඔවුන්ව නුසුදුසු පරිසර පද්ධතීන් කරා වේගයෙන් රැගෙන යන “අධිවේගී වාහකයන්” ලෙස ක්රියා කරන බවත්, මෙය මිනිස් සහ වනජීවී අන්තර්ක්රියා පිළිබඳව මෙතෙක් අවධානයට ලක් නොවූ බරපතල අංශයක් බවත් පර්යේෂකයෝ වැඩිදුරටත් පවසති.
