හිටපු ශ්රී ලංකා ක්රිකට් නායක කුමාර් සංගක්කාර මහතා ආයෝජන අවස්ථාවක් ප්රවර්ධනය කරන බවට අඟවමින් සමාජ මාධ්ය හරහා සංසරණය වන වීඩියෝවක් සහ පුවත් වාර්තා පෙළක් සම්පූර්ණයෙන්ම අසත්ය සහ සංවිධානාත්මක මූල්ය වංචාවක් බවට තහවුරු වී තිබේ. Factcrescendo වෙබ් අඩවිය මගින් සිදුකළ කරුණු විමර්ශනයකදී අනාවරණය වී ඇත්තේ කුමාර් සංගක්කාර මහතා පමණක් නොව ව්යවසායික ඔටාරා ගුණවර්ධන මහත්මිය සහ හිටපු ජනාධිපති රනිල් වික්රමසිංහ මහතාගේ නම පවා භාවිතා කරමින් මෙලෙස ව්යාජ ආයෝජන ප්රචාරණ පවත්වාගෙන ගොස් ඇති බවයි. ප්රසිද්ධ පුවත් වෙබ් අඩවිවල ස්වරූපයට සමාන ලෙස සකස් කර ඇති මෙම ව්යාජ වාර්තා හරහා මහජනතාව නොමග යැවීමට වංචාකරුවන් කටයුතු කර ඇත.
ශ්රී ලංකා පරිගණක හදිසි ප්රතිචාර සංසදය (SLCERT) විසින් මේ සම්බන්ධයෙන් විශේෂ විමර්ශනයක් පවත්වා ඇති අතර මෙම පෝස්ට් තුළ අන්තර්ගත සබැඳි (links) ක්ලික් කිරීමෙන් පෞද්ගලික දත්ත හෝ ෆේස්බුක් ගිණුම්වල මුරපද සොරා ගැනීමට අවස්ථාව පවතින බව සයිබර් ආරක්ෂණ විශේෂඥ අසේල වෛද්යලංකාර මහතා පෙන්වා දෙයි. මෙම වංචනික පෝස්ට් ඉතා විශ්වාසදායක ලෙස සකස් කර ඇති බැවින්, කිසිදු පෞද්ගලික තොරතුරක් හෝ මුදලක් මෙවැනි අනවසර සබැඳි හරහා ලබා නොදෙන ලෙස බලධාරීහු මහජනතාවගෙන් ඉල්ලා සිටිති. විශේෂයෙන්ම මැදපෙරදිග අර්බුදය හමුවේ ආර්ථික අපහසුතාවලට මුහුණ දී සිටින ජනතාව මෙවැනි “ඉක්මනින් මුදල් සෙවිය හැකි” ව්යාජ ක්රමවේදවලට හසු වීමේ වැඩි ප්රවණතාවක් පවතින බැවින් මේ පිළිබඳව දැඩි අවධානයෙන් පසුවීම අත්යවශ්ය වේ.
