මධ්ය ප්රදේශ්හි කූනෝ ජාතික උද්යානයෙන් (Kuno National Park) මායිම් ඉක්මවා පලා ආ ‘KP-2’ නමැති රේඩියෝ කරපටි පැළඳි අප්රිකානු චීටා, මාස කිහිපයකට පසු යළිත් වරක් රාජස්ථානයේ බාරන් (Baran) දිස්ත්රික්කයේ කිෂාන්ගන්ජ් වනාන්තර ප්රදේශයේදී සොයාගෙන තිබේ. ඊයේ (සෙනසුරාදා) මෙම චීටා බන්ජම්ලි ගම්මානයේ ගසක් යට විවේක ගනිමින් සිටියදී වන නිලධාරීන්ගේ නෙත ගැටී ඇත. මීට පෙර පසුගිය වසරේ නොවැම්බර් මාසයේදී ද මෙම සත්ත්වයා බාරන් දිස්ත්රික්කයට පැමිණි අතර, පසුව දෙසැම්බර් 12 වැනිදා නැවත කූනෝ උද්යානය වෙත රැගෙන යාමට බලධාරීන් පියවර ගෙන තිබුණි.
වනජීවී නිලධාරීන් පවසන පරිදි, පසුගිය වසර දෙකක කාලය තුළ කූනෝ උද්යානයේ සිට චීටාවකු රාජස්ථාන සීමාවට ඇතුළු වූ සිව්වැනි අවස්ථාව මෙයයි. මීට පෙර ‘අග්නි’ (Agni) නමැති චීටා ද මෙලෙස මායිම් ඉක්මවා පැමිණි අතර, වනජීවී කණ්ඩායම් විසින් එම සතුන් නිර්වින්දනය කර යළි රැගෙන යනු ලැබීය. කෙසේ වෙතත්, මෙවර ‘KP-2’ චීටා තවමත් කිසිදු සතෙකු දඩයම් කර නොමැති අතර, සත්ත්වයා ඉතා නිරෝගී මට්ටමේ පසුවන බව නිරීක්ෂණය වී තිබේ.
මේ වන විට කූනෝ සහ බාරන් වනජීවී කණ්ඩායම් ඒකාබද්ධව මීටර් 100-200ක පමණ දුරක සිට චීටාගේ ගමන් බිමන් සමීපව නිරීක්ෂණය කරමින් සිටිති. දැනට සත්ත්වයා නිර්වින්දනය කිරීමේ (Tranquilize) සූදානමක් නොමැති වුවද, ප්රදේශවාසී ගම්වැසියන් මේ පිළිබඳව දැනුවත් කර ඔවුන්ට දැඩි විමසිල්ලෙන් පසුවන ලෙස අවවාද කර ඇත. ඉදිරි දින කිහිපය තුළ මෙම චීටා නැවත කූනෝ ජාතික උද්යානය වෙත ආරක්ෂිතව රැගෙන යාමට අවශ්ය විධිවිධාන සලසමින් පවතින බව බාරන් දිස්ත්රික් වන සංරක්ෂක බාදේ විවේකානන්ද් මාණික්රාඕ මහතා තහවුරු කළේය.
