මහා ශිවරාත්රී උත්සවය නිමිත්තෙන් අද (15) අලුයම සිටම ඉන්දියාවේ ප්රයාග්රාජ් හි සංගම් තොටුපළ (Sangam ghats) වෙත ලක්ෂ 10 කට අධික බැතිමතුන් පිරිසක් පැමිණ ශුද්ධ වූ ගංගා ජලයේ ස්නානය කරමින් වතාවත්වල නිරත වූහ. මෙය වාර්ෂික ‘මාඝ මේලා’ (Magh Mela) පුණ්ය මහෝත්සවයේ අවසන් ප්රධාන ස්නාන දිනය ද වන බැවින් වෙනදාටත් වඩා විශාල ජනකායක් ගංගා ඉවුරුවල රොක්වී සිටිනු දක්නට ලැබිණි. උදෑසන සිටම ප්රදේශය පුරා ශිව දෙවියන් උදෙසා කෙරෙන යාඥා සහ ස්තෝත්ර ගායනා හඬ රැව්දුන් අතර, ආරක්ෂාව වෙනුවෙන් උත්තර ප්රදේශ් ත්රස්ත විරෝධී බලකාය (ATS) ඇතුළු විශාල පොලිස් කණ්ඩායමක් යොදවා තිබේ.
ප්රයාග්රාජ් හි පමණක් නොව, වාරාණසියේ කාශි විශ්වනාත් දේවාලය (Kashi Vishwanath Temple) අසල ද බැතිමතුන්ගේ දිගු පෝලිම් දක්නට ලැබුණු අතර, අද උදෑසන වන විටත් 1,60,000 කට අධික පිරිසක් එහි වතාවත් අවසන් කර තිබුණි. මෙම වසරේ මුළු උත්සව සමය තුළ බැතිමතුන් මිලියන 8 සිට 10 දක්වා පිරිසක් වාරාණසියට පැමිණෙනු ඇතැයි දේවාල පරිපාලනය අපේක්ෂා කරයි. මහා ශිවරාත්රිය යනු ශිව දෙවියන් සහ පාර්වතී දේවියගේ විවාහ මංගල්යය සහ විශ්වයේ අඳුර දුරු කිරීම සංකේතවත් කරන ලොව පුරා හින්දු බැතිමතුන්ගේ අති උදාර ආගමික මංගල්යයකි.
