ඉන්ධන නිකුත් කිරීමේ QR කේත ක්රමවේදය තුළ දැනට පවතින තාක්ෂණික බාධාවන් හෙට (17) උදෑසන වන විට සම්පූර්ණයෙන්ම මඟහැරී යනු ඇතැයි ඩිජිටල් ආර්ථික නියෝජ්ය අමාත්ය එරංග වීරරත්න මහතා පවසයි. ගෝලීය දේශපාලනික අර්බුද හමුවේ මෙරට ඉන්ධන සංචිත සුරක්ෂිත කරගැනීම සඳහා මෙම නව ක්රමවේදය හඳුන්වා දුන් බව අමාත්යවරයා අවධාරණය කළේය.
මැදපෙරදිග යුදමය වාතාවරණය නිසා බොහෝ රටවල් ඉන්ධන පරිභෝජනය සීමා කර ඇති බවත්, ලංකා ඛනිජ තෙල් නීතිගත සංස්ථාව සතුව ප්රමාණවත් සංචිත පැවතියද ඒවා දීර්ඝ කාලයක් පවත්වාගෙන යාමට ක්රමානුකූල බෙදාහැරීමක් අවශ්ය බවත් ඔහු පෙන්වා දුන්නේය. වාහන අයිතිය වෙනස් වීම සහ දුරකථන අංක පිළිබඳ පැවති ගැටලු විසඳා ඇති අතර, වාහන ලියාපදිංචිය ඉවත් කිරීමේ (Deregister) පහසුකම ද දැන් විධිමත් කර ඇත. වාහන අලෙවි කළ පුද්ගලයන්ට සිය ගිණුමෙන් එම වාහන ඉවත් කරන ලෙස අමාත්යවරයා ඉල්ලා සිටියි. මෙම වැඩපිළිවෙළ වෙනුවෙන් ඉන්ධන පිරවුම්හල් සේවකයන් සහ හිමිකරුවන් පුහුණු කිරීමේ කටයුතු අද (16) දිනය තුළ අවසන් කිරීමට නියමිතය.
ඉන්ධන හිඟයක් පිළිබඳ අනවශ්ය බියක් ඇති කරගනිමින් පෝලිම් නිර්මාණය නොකරන ලෙසත්, රජයේ මෙම කළමනාකරණ ක්රියාවලියට සහයෝගය ලබා දෙන ලෙසත් අමාත්යවරයා ජනතාවගෙන් ඉල්ලා සිටියේය.
