ලංකා සමසමාජ පක්ෂය විසින් පවත්වන ලද විශේෂ මාධ්ය හමුවකදී, මැදපෙරදිග පවතින යුදමය වාතාවරණය සහ ශ්රී ලංකාවේ වත්මන් ආර්ථික හා දේශපාලන තත්ත්වය පිළිබඳව පක්ෂයේ විග්රහය ඉදිරිපත් කරන ලදී. එහිදී ප්රධාන වශයෙන් අවධාරණය කෙරුණේ ඉරානය, අමෙරිකාව සහ ඊශ්රායලය අතර පවතින ගැටුම හුදු අධිරාජ්යවාදී බලවතුන් දෙපිරිසක් අතර ගැටුමක් නොවන බවයි. එය අධිරාජ්යවාදී පීඩනයට එරෙහිව නැගී සිටින, එහෙත් ප්රමාදිත සංවර්ධනයකට ලක්වූ රටක් සහ අධිරාජ්යවාදීන් අතර අරගලයක් ලෙස පක්ෂය හඳුනා ගනී. කෙසේ වෙතත්, ඉරානයේ පාලන තන්ත්රය ආගම්වාදී ධනේශ්වර රජයක් බැවින්, ට්රොට්ස්කිවාදීන් ලෙස අධිරාජ්ය විරෝධයට සහාය දුන්නද එරට පාලක පන්තියට දේශපාලනිකව පක්ෂපාතී නොවන බවත්, එරට වැඩකරන පන්තියේ ආධිපතිත්වය තහවුරු කිරීමට සහාය දෙන බවත් පක්ෂය අවධාරණය කළේය.
ශ්රී ලංකාවේ දේශපාලන ඉතිහාසය තුළ වැඩකරන පන්තියේ අයිතිවාසිකම් දිනා දීමට පෙරමුණ ගත් ලංකා සමසමාජ පක්ෂය, පසුගිය දශක කිහිපය තුළ යම් පසුබෑමකට ලක්වූ බව මෙහිදී පිළිගනු ලැබීය. පක්ෂයේ ආරම්භක නායකයන්ගේ වියෝව සහ විවිධ දේශපාලන හේතු මෙයට බලපා ඇති බව පෙන්වා දුන් පක්ෂ නායකත්වය, අද පවතින දැවැන්ත ආර්ථික අර්බුදය හමුවේ වැඩකරන ජනතාවගේ අයිතීන් සුරැකීමට නායකත්වය දිය හැකි පක්ෂයක පවතින හිඩැස පිරවීම සඳහා යළිත් සක්රීයව පෙරමුණ ගැනීමට තීරණය කර ඇත. එදා සටන් කර දිනාගත් අයිතිවාසිකම් වත්මන් ධනේශ්වර පාලකයන් විසින් උදුරා ගැනීමට දරන උත්සාහයට එරෙහිව වැඩකරන ජනතාව බලමුලු ගැන්වීම තම අරමුණ බව පක්ෂය සඳහන් කළේය.
ලංකාව අද වන විට ජාත්යන්තර මූල්ය අධිරාජ්යවාදයේ යටත් විජිතයක් බවට පත්ව ඇති බවට පක්ෂය චෝදනා කරයි. දේශීය ධනපති පන්තිය සිය පැවැත්ම සඳහා ජාත්යන්තර මූල්ය අරමුදල (IMF) වැනි ආයතනවල කොන්දේසිවලට යටත් වීම නිසා නිදහස් අධ්යාපනය, සෞඛ්යය සහ මහජන සහනාධාර කප්පාදු වෙමින් පවතින බව ඔවුහු පෙන්වා දෙති. ගමනාගමනය ඇතුළු රාජ්ය සේවාවන් පෞද්ගලික අංශයේ ලාභය වෙනුවෙන් පාවා දීමට රජය කටයුතු කරමින් සිටින බවත්, මෙහි ප්රතිඵලයක් ලෙස රට ආර්ථික, සමාජීය හා සංස්කෘතික වශයෙන් විශාල පිරිහීමකට ලක්ව ඇති බවත් පක්ෂය වැඩිදුරටත් ප්රකාශ කළේය.
මෙම විනාශකාරී තත්ත්වයට මුහුණ දිය හැක්කේ විසිරී සිටින වැඩකරන ජනතාව සහ පීඩිත ගොවි ජනතාව එක් පෙරමුණකට බලමුලු ගැන්වීමෙන් පමණක් බව සමසමාජ පක්ෂය විශ්වාස කරයි. ඒ වෙනුවෙන් වන දැවැන්ත ජනතා අරගලයකට නායකත්වය දීම සඳහා පක්ෂය සූදානම් බවත්, ධනේශ්වර පාලකයන්ගේ සහ ජාත්යන්තර මූල්ය ආයතනවල අත්තනෝමතික ක්රියාවන්ට එරෙහිව නැගී සිටින ලෙසත් පක්ෂය සමස්ත වැඩකරන ජනතාවගෙන් ඉල්ලා සිටියි.
