ශ්රී ලංකාවෙන් බිහි වූ සුපිරි වේගපන්දු යවන්නෙකු වන ලසිත් මාලිංග සහ සිංගර් ශ්රී ලංකා (Singer Sri Lanka) සමාගම එක්ව සංවිධානය කරනු ලබන ‘Singer Pace Hunt with Lasith Malinga’ ජාතික වේගපන්දු දක්ෂතා ගවේෂණ වැඩසටහන අද (2026 මාර්තු 16) නිල වශයෙන් ආරම්භ විය. මෙරට මීළඟ පරම්පරාවේ දක්ෂ වේගපන්දු යවන්නන් හඳුනාගෙන ඔවුන්ව ජාත්යන්තර මට්ටම දක්වා ඔසවා තැබීම මෙම වැඩසටහනේ මූලික අරමුණයි.
මෙම සුවිශේෂී වැඩසටහනේ සමාරම්භක වටය අද කොළඹ සුගතදාස ක්රීඩාංගණයේදී පැවැත්වුණු අතර, ඒ සඳහා දිවයිනේ නන්දෙසින් පැමිණි තරුණ ක්රීඩකයින් විශාල පිරිසක් සහභාගී වූහ. වයස අවුරුදු 17 ත් 22 ත් අතර පසුවන ක්රීඩකයින් ඉලක්ක කර ගනිමින් දියත් කළ මෙම ව්යාපෘතිය සඳහා අයදුම්පත් 3,000 කට අධික සංඛ්යාවක් ලැබී තිබූ අතර, ඉන් තෝරාගත් ක්රීඩකයින් 350 දෙනෙකු පළමු අදියරේ ශාරීරික යෝග්යතා පරීක්ෂණ සඳහා සහභාගී කරවා ගන්නා ලදී. එහිදී කිලෝමීටර් 2 ක ධාවන පරීක්ෂණයක් සාර්ථකව නිම කළ ක්රීඩකයින්ට සිය පන්දු යැවීමේ වේගය පරීක්ෂා කිරීමේ අවස්ථාව හිමි වූ අතර, පැයට කිලෝමීටර් 135 ට වඩා වැඩි වේගයකින් පන්දු යැවිය හැකි ක්රීඩකයින් මීළඟ වටය සඳහා තෝරා ගැනුණි.
සිය නව ව්යාපෘතිය පිළිබඳව අදහස් දක්වමින් ලසිත් මාලිංග කියා සිටියේ ශ්රී ලංකා ක්රිකට් ක්රීඩාවෙන් තමන් ලැබූ දේ නැවත රටට දායක කිරීමේ අරමුණින් මෙම වැඩසටහන ආරම්භ කළ බවයි. විශේෂයෙන්ම ශ්රී ලංකා කණ්ඩායමේ ඉදිරි ගමන සඳහා දක්ෂ වේගපන්දු යවන්නන් රැසක් බිහි කිරීමට තමන් කැපවන බවත්, ඒ සඳහා අනුග්රහය දක්වන සිංගර් සමාගමට සහ ශ්රී ලංකා ක්රිකට් ආයතනයට ස්තූතිවන්ත වන බවත් ඔහු පැවසීය. සිංගර් ශ්රී ලංකා සමූහ කළමනාකාර අධ්යක්ෂ මහේෂ් විජේවර්ධන මහතා සඳහන් කළේ 1996 ලෝක කුසලාන ජයග්රහණයේ සිට ක්රිකට් ක්රීඩාව සමඟ බැඳී සිටින තම සමාගම, මාලිංග සමඟ එක්ව මීළඟ පරම්පරාවේ ක්රීඩකයින් සවිබල ගැන්වීමට ලැබීම සතුටක් බවයි.
මෙම වැඩසටහන අවසානයේ තෝරාගනු ලබන දක්ෂතම ක්රීඩකයින් 20 දෙනාට ශ්රී ලංකා ක්රිකට් වේගපන්දු ඇකඩමිය (SLC Fast Bowling Academy) වෙත නිර්දේශ ලබා දීමට නියමිතය. එමඟින් ඔවුන්ට වෘත්තීය මට්ටමේ ක්රිකට් ක්රීඩකයින් ලෙස ඉදිරියට යාමට සෘජු අවස්ථාවක් හිමි වේ. ඉදිරි මාස කිහිපය තුළ දිවයිනේ අනෙකුත් ප්රදේශවල ද මෙවැනිම තේරීම් කඳවුරු පැවැත්වීමට සැලසුම් කර ඇත.
