තලංගම, අකුරේගොඩ ප්රදේශයේදී නීතිඥ බුද්ධික මල්ලවආරච්චි මහතා සහ ඔහුගේ බිරිඳ වෙඩි තබා ඝාතනය කිරීමට විරෝධය පළ කරමින් දිවයින පුරා සියලුම අධිකරණවල නීතිඥවරුන් අද (16) සිය වෘත්තීය කටයුතුවලින් ඉවත්ව සිටීමට තීරණය කර තිබේ. ශ්රී ලංකා නීතිඥ සංගමයේ (BASL) සභාපති නීතිඥ රජීව් අමරසූරිය මහතාගේ ප්රධානත්වයෙන් ඊයේ (15) පස්වරුවේ කොළඹදී පැවති විශේෂ මහා සභා රැස්වීමේදී මෙම තීරණය ඒකමතිකව ගනු ලැබීය. වසර 14කට පසුව කැඳවන ලද මෙම විශේෂ රැස්වීමට නීතිඥවරුන් 3,500කට අධික පිරිසක් සෘජුව සහ සූම් (Zoom) තාක්ෂණය ඔස්සේ සහභාගී වී තිබීම විශේෂත්වයකි.
මෙම ඛේදජනක සිදුවීම සම්බන්ධයෙන් නීතිඥ සංගමය විසින් ප්රධාන තීරණ 4ක් ප්රකාශයට පත් කරන ලදී. ඒ අනුව, වර්තමානයේ රටේ පවතින “ඝාතන සංස්කෘතිය” වහාම නතර කර මහජන ආරක්ෂාව තහවුරු කිරීමට රජය පියවර ගත යුතු බවට බලකිරීම ඉන් පළමුවැන්නයි. දෙවනුව, අද දින සියලු අධිකරණ කටයුතුවලින් ඉවත්වී විරෝධය දැක්වීමට තීරණය කළ අතර, තෙවනුව, මෙම අපරාධයට සම්බන්ධ සියලු දෙනා වහාම අත්අඩංගුවට ගන්නා ලෙස පොලිසියට සහ ආරක්ෂක අංශවලට දැඩි ලෙස බලකර සිටියි. සිව්වන තීරණය ලෙස, මෙම සිදුවීම සම්බන්ධයෙන් තහවුරු නොකළ හෝ සාවද්ය තොරතුරු සමාජගත කිරීමට උත්සාහ කරන පාර්ශවයන් වෙත සිය දැඩි අප්රසාදය පළ කිරීමට ද සංගමය පියවර ගෙන ඇත.
ඝාතනය සම්බන්ධ විමර්ශනවලදී අනාවරණය වී ඇත්තේ පසුගිය සිකුරාදා සවස 5ට පමණ අකුරේගොඩ සුපිරි වෙළඳසැලක රථ ගාලකදී T-56 ගිනිඅවියකින් මෙම වෙඩි තැබීම සිදු කර ඇති බවයි. ඝාතනයට පැමිණි සැකකරුවන් ගමන් ගත් “නිශාන් සනී” වර්ගයේ මෝටර් රථය ගාල්ල, බද්දේගම ප්රදේශයේදී ගිනිතබා විනාශ කර තිබියදී පොලිසිය විසින් සොයාගෙන තිබේ. මෙම අපරාධය මෙහෙයවා ඇත්තේ දැනට විදෙස්ගතව සිටින සංවිධානාත්මක අපරාධකරුවෙකු වන “කරන්දෙණිය සුද්දා” විසින් බවට සැක කෙරෙන අතර, සැකකරුවන් අත්අඩංගුවට ගැනීම සඳහා අපරාධ පරීක්ෂණ දෙපාර්තමේන්තුව (CID) ඇතුළු විශේෂ පොලිස් කණ්ඩායම් 10ක් දැනටමත් විමර්ශන අරඹා ඇත.
