ලෙබනනයේ නැගෙනහිර බේකා (Bekaa) නිම්නයේ පිහිටි නබි චිට් (Nabi Chit) ගම්මානය ඉලක්ක කර ගනිමින් ඉස්රායල හමුදාව ඊයේ (07) රාත්රියේ දියත් කළ සුවිශේෂී හමුදා මෙහෙයුමකින් පුද්ගලයින් 41 දෙනෙකු මියගොස් තවත් 40 දෙනෙකු තුවාල ලබා තිබේ. මියගිය පිරිස අතර ලෙබනන් හමුදා සෙබළුන් තිදෙනෙකු සහ කුඩා ළමුන් ද සිටින බව එරට සෞඛ්ය අමාත්යාංශය තහවුරු කරයි.
මෙම මෙහෙයුම සම්බන්ධයෙන් වාර්තා වන සුවිශේෂී තොරතුරු කිහිපයක් මෙසේය. වසර 40කට පෙර එනම් 1986 වසරේදී අතුරුදන් වූ ඉස්රායල ගුවන් නියමුවෙකු වන රොන් අරාඩ්ගේ (Ron Arad) සිරුරු කොටස් සොයා ගැනීම මෙම මෙහෙයුමේ ප්රධාන අරමුණ වී තිබුණි. ඒ අනුව ඉස්රායල කොමාන්ඩෝ ඒකකයක් ලෙබනන් හමුදා නිල ඇඳුමින් සැරසී සහ ගිලන් රථ භාවිත කරමින් රහසිගතව ගම්මානයට ඇතුළු වී එහි වූ සුසාන භූමියක සොහොනක් හෑරීමට කටයුතු කර ඇතත්, එහි තිබී කිසිවක් හමු වී නොමැත.
මෙම රහසිගත ඇතුළු වීම හඳුනාගත් හිස්බුල්ලා සටන්කාමීන් සහ ප්රදේශවාසීන් ඉස්රායල හමුදාව වට කර ප්රහාර එල්ල කර ඇති අතර, එහිදී ඇති වූ දරුණු ගැටුම් මධ්යයේ ඉස්රායල හමුදාවට පසුබැසීමට සහාය වීම සඳහා එරට ගුවන් හමුදාව විසින් එම ප්රදේශයට ගුවන් ප්රහාර 40ක් පමණ එල්ල කර තිබේ. ඉස්රායල හමුදාව ප්රකාශ කළේ තම සෙබළුන්ට හානියක් නොවූ බවත්, අතුරුදන් වූ පුතුන් නැවත මව්බිමට ගෙන ඒම සඳහා ඕනෑම පියවරක් ගන්නා බවත්ය. කෙසේ වෙතත්, රොන් අරාඩ්ගේ බිරිඳ වන ටැමි අරාඩ් ප්රකාශ කර ඇත්තේ මියගිය සිරුරු කොටස් වෙනුවෙන් ජීවතුන් අතර සිටින සෙබළුන්ගේ ජීවිත අනතුරේ නොදමන ලෙසයි.
