ඊයේ (08) ඊශ්රායලය විසින් ලෙබනනයට එල්ල කළ දැවැන්ත ගුවන් ප්රහාර මාලාව හේතුවෙන් තුවාල ලැබූවන් සඳහා රුධිරය ලබාදීමට ඉදිරිපත් වන ලෙස ලෙබනන් රතු කුරුස සංවිධානය (LRC) මහජනතාවගෙන් හදිසි ඉල්ලීමක් කර තිබේ. මෙම ප්රහාරවලින් පුද්ගලයන් 250 කට අධික පිරිසක් මියගොස් 1,100 කට වැඩි පිරිසක් තුවාල ලබා ඇති අතර, බෙයිරූට් ඇතුළු ප්රධාන නගරවල රෝහල් තුවාලකරුවන්ගෙන් පිරී පවතින බව විදෙස් වාර්තා සඳහන් කරයි.
ලෙබනන් රතු කුරුස සංවිධානයේ සභාපති ඇන්ටොයින් සොග්බි මහතා ප්රකාශ කර ඇත්තේ, මෙම අර්බුදකාරී අවස්ථාවේදී රුධිරය සඳහා පවතින දැඩි අවශ්යතාවය සපුරාලීමට බොහෝ පිරිසක් ස්වේච්ඡාවෙන් ඉදිරිපත් වෙමින් සිටින බවයි. විශේෂයෙන්ම බෙයිරූට් ඇමරිකානු විශ්වවිද්යාල වෛද්ය මධ්යස්ථානය (AUBMC) වැනි ප්රධාන රෝහල්වල වෛද්ය සැපයුම් අඩු වෙමින් පවතින බැවින්, මෙම රුධිර පරිත්යාගයන් ජීවිත බේරා ගැනීම සඳහා අතිශය තීරණාත්මක වී තිබේ.
ලෙබනනය පුරා ස්ථාන 150 කට අධික සංඛ්යාවකට එල්ල වූ මෙම ප්රහාරය, 2026 වසරේ ආරම්භ වූ ගැටුම් මාලාවේ දරුණුතම අවස්ථාවක් ලෙස සැලකේ. ඉරානය සහ ඇමරිකාව මැදිහත් වී ප්රකාශයට පත් කළ තාවකාලික සටන් විරාමයකින් පැය කිහිපයකට පසුව මෙම ප්රහාරය එල්ල වීම විශේෂත්වයකි. ඕනෑම දුෂ්කර අවස්ථාවකදී ලෙබනන් වැසියන් පෙන්වන එකමුතුකම මෙහිදී ද කැපී පෙනෙන බවත්, රුධිර මධ්යස්ථාන වෙත පැමිණෙන ජනතාවගේ සහයෝගය අගය කරන බවත් රතු කුරුස සංවිධානය වැඩිදුරටත් පවසා ඇත.
