එළැඹෙන සිංහල හා දමිළ අලුත් අවුරුද්දට සමගාමීව පවත්වන අවුරුදු උත්සවවල සංස්කෘතියට පටහැනි වන ආකාරයේ උත්සව අංග සහ ක්රීඩා ඇතුළත් කර තිබේ නම් ඒ පිළිබඳව නීතිමය ක්රියාමාර්ග ගන්නා බව බුද්ධශාසන, ආගමික හා සංස්කෘතිය කටයුතු අමාත්ය විදුර වික්රමනායක මහතා පවසයි.
එමෙන්ම අවුරුදු උත්සව පැවැත්වීමට අදාල උපදේශන මාලාවක් මේ වන විට සියලුම දිස්ත්රික් ලේකම්වරු මාර්ගයෙන් ප්රාදේශීය ලේකම්වරු වෙත ලබා දී ඇති බවද අමාත්යවරයා සඳහන් කළේය.
අමාත්යවරයා මේ බව පැවසුවේ ඊයේ (05) අවුරුදු උත්සවවල පවත්වන සදාචාර විරෝධී උත්සව අංග ඉවත් කිරීම හා නිර්මාණාත්මක අංග එකතු කිරීම පිළිබඳව යෝජනා ඉදිරිපත් කිරීමේ මාධ්ය හමුවට එක්වෙමිනි.
ඒ අනුව අවුරුදු උත්සවවලට ඇතුළත් කර ඇති උත්සව අංග සහ ක්රීඩා අදාළ ප්රාදේශීය ලේකම් කාර්යාලය වෙත ලබා දී ලියාපදිංචි කළ යුතු බවත්, ඉන්පසු ශබ්ද විකාශන යන්ත්ර භාවිතා කිරීම සඳහා පොලිසිය අනුමැතිය ලබා ගත යුතු බවත්, බුද්ධශාසන, ආගමික හා සංස්කෘතික කටයුතු අමාත්යාංශ අතිරේක ලේකම් කේ. ඩී.ආර්. නිශාන්ති ජයසිංහ මහත්මිය එහිදී සඳහන් කළාය.
අවුරුදු උත්සවවලදී අසභ්ය ලෙස පවත්වනු ලබන ක්රීඩා හා උත්සව අංග පිළිබඳව මෙන්ම ආගමික වශයෙන් හානි වන ක්රියාකාරකම් පිළිබඳව වැඩි අවධානයක් යොමු කරන අතර ඒ පිළිබඳව පවතින නීති යටතේ ක්රියාත්මක වන බව පොලිස් මාධ්ය ප්රකාශක නියෝජ්ය පොලිස්පති නිහාල් තල්දූව මහතා එහිදී ප්රකාශ කර සිටියේය.
අධ්යාපන අමාත්යංශ පිරිවෙන් අධ්යක්ෂ ආචාර්ය පූජ්ය කුඹල්ගොඩ ධම්මාලෝක හිමි, බුද්ධශාසන, ආගමික හා සංස්කෘතික කටයුතු අමාත්යාංශ අතිරේක ලේකම් තිලක් හෙට්ටිආරච්චි, ශ්රී ලංකා කලා මණ්ඩලයේ සභාපති මහාචාර්ය ප්රණීත් අභයසුන්දර, සංස්කෘතික කටයුතු අධ්යක්ෂ යසින්තා ගුණවර්ධන යන මහත්ම මහත්මීහු ඇතුළු පිරිසක් මෙම අවස්ථාවට එක්ව සිටියහ.
