ශ්රී ලංකාවට ආවේණික සත්ත්ව විශේෂයක් වන ශ්රී ලංකා කොටියන් (Panthera pardus kotiya) මියයාම 2025 වසරේදී කැපී පෙනෙන ලෙස ඉහළ ගොස් ඇති බව වනජීවී සංරක්ෂණ දෙපාර්තමේන්තුව අනාවරණය කරයි. වනජීවී අධ්යක්ෂ (සෞඛ්ය) වෛද්ය සී. ජී. විජේසිංහ මහතා පෙන්වා දෙන්නේ 2024 වසරේ වාර්තා වූ කොටි මරණ 14 සාපේක්ෂව 2025 වසරේදී එම අගය 25 දක්වා ඉහළ ගොස් ඇති බවයි. මෙම මරණවලට ප්රධාන වශයෙන් මිනිස් ක්රියාකාරකම් බලපා ඇති අතර කම්බි මඳුවලට හසුවීමෙන් සහ විෂ ශරීරගත වීමෙන් කොටියන් පස් දෙනෙකු බැගින් මියගොස් තිබේ. මීට අමතරව වාහනවල ගැටීමෙන්, වෙඩි වැදීමෙන් සහ හක්කපටස් ආහාරයට ගැනීමෙන් ද මරණ වාර්තා වී ඇත.
මෙම මරණ වැඩි වශයෙන් වාර්තා වී ඇත්තේ මධ්යම කඳුකරයේ වතු ආශ්රිත ප්රදේශවලින් සහ ජාතික උද්යාන ආශ්රිතව වන අතර පුස්සැල්ලාව, තලවකැලේ, හග්ගල, කිලිනොච්චිය, උඩවලව සහ යාල වැනි ප්රදේශ ඒ අතර වේ. පසුගිය වසර තුනක කාලය තුළ පමණක් මෙරට කොටි මරණ 51ක් වාර්තා වී ඇති අතර පරිසරවේදීන් අනතුරු අඟවන්නේ සත්ය වශයෙන්ම සිදුවන මරණවලින් වාර්තා වන්නේ 20%ක් වැනි සුළු ප්රමාණයක් පමණක් බවයි. ලොව සිටින කොටි උප විශේෂ අටෙන් ශ්රී ලංකාවට පමණක් ආවේණික මෙම සත්ත්වයා වඳවී යාමේ දැඩි තර්ජනයකට ලක්ව ඇති බැවින්, උන්ගේ පැවැත්ම තහවුරු කිරීමට කඩිනම් සංරක්ෂණ වැඩපිළිවෙළක් අවශ්ය බව විශේෂඥයෝ පෙන්වා දෙති.
