ලොව පුරා දැඩි ආන්දෝලනයකට තුඩු දුන් ලිංගික අපරාධකරුවකු වූ අභාවප්රාප්ත ජෙෆ්රි එප්ස්ටයින්ට සම්බන්ධ මිනිස් ජාවාරම් ජාලයක් පිළිබඳව සිදුකරන විමර්ශන සඳහා ලිතුවේනියාව (Lithuania) ඇමෙරිකා එක්සත් ජනපදයේ නීතිමය සහාය ලබා ගැනීමට සූදානම් වන බව රොයිටර් පුවත් සේවය අද (02) වාර්තා කළේය.
ලිතුවේනියානු අභිචෝදක ජනරාල් විතා ගෘන්ස්කියන් (Vita Grunskiene) මහත්මිය ප්රකාශ කළේ, මෙම මිනිස් ජාවාරම් සිද්ධියට අදාළව දැනට පුද්ගලයන් 20 දෙනෙකුගෙන් පමණ ප්රශ්න කර ඇති බවයි. කෙසේ වෙතත්, මෙතෙක් කිසිවෙකුට එරෙහිව නිල වශයෙන් නඩු පවරා නොමැති අතර, වැඩිදුර තොරතුරු ලබා ගැනීම සඳහා ඇමෙරිකාවෙන් නීතිමය ආධාර (Legal aid) ඉල්ලා සිටීමට කටයුතු සූදානම් කරමින් සිටින බව ඇය සඳහන් කළාය. එමෙන්ම මෙම ජාවාරමට ගොදුරු වූවන් සිටී නම් වහාම බලධාරීන් වෙත ඉදිරිපත් වන ලෙස ද ඇය ඉල්ලා සිටියි.
ඉරාන යුද්ධය වැනි ගෝලීය අර්බුද හමුවේ වුවද, ජාත්යන්තර මට්ටමින් සිදුවූ මෙවැනි බරපතල අපරාධ ජාලයන් හෙළි කර ගැනීමට යුරෝපීය රටවල් සහ ඇමෙරිකාව එක්ව කටයුතු කිරීම ඉතා වැදගත් පියවරක් ලෙස සැලකේ. මීට පෙර 2025 දෙසැම්බර් මාසයේදී ඇමෙරිකානු අධිකරණ දෙපාර්තමේන්තුව විසින් එප්ස්ටයින් සහ ගිස්ලේන් මැක්ස්වෙල් (Ghislaine Maxwell) සම්බන්ධ නව ලේඛන රැසක් ප්රසිද්ධියට පත් කිරීමත් සමඟ මෙම පරීක්ෂණවල අලුත් හැරවුම් ලක්ෂයක් සනිටුහන් විය.
