මෙරට ගෑස් පාරිභෝගිකයින් මුහුණ දෙන ගැටලු නිරාකරණය කරමින් ලිට්රෝ (Litro) සහ ලාෆ්ස් (Laugfs) සමාගම්වලට අයත් ගෑස් නෞකා දෙකක් අද (27) සහ හෙට (28) දිවයිනට ළඟා වීමට නියමිතය. මෙම නව තොග ලැබීමත් සමඟ වෙළඳපොළේ පවතින ගෑස් හිඟය අවම වනු ඇතැයි අපේක්ෂා කෙරේ.
ලිට්රෝ ගෑස් සමාගම සඳහන් කරන්නේ පවතින ඉල්ලුම සපුරාලීම සඳහා සිය දෛනික ගෑස් සැපයුම මෙට්රික් ටොන් 1,700 දක්වා ඉහළ නැංවීමට පියවර ගෙන ඇති බවයි. මේ හරහා දිවයින පුරා පවතින බෙදාහැරීමේ ජාලය ශක්තිමත් කිරීමටත්, පාරිභෝගිකයින්ට පවතින පෝලිම් තත්ත්වය මඟහරවා ගැනීමටත් හැකි වනු ඇතැයි එම සමාගම වැඩිදුරටත් විශ්වාසය පළ කරයි.
ලාෆ්ස් ගෑස් සමාගම ද සිය නෞකාව මෙරටට ළඟා වූ වහාම පිරවීමේ සහ බෙදාහැරීමේ කටයුතු කඩිනම් කිරීමට සැලසුම් කර තිබේ. බලශක්ති අර්බුදය මධ්යයේ ගෑස් සැපයුම අඛණ්ඩව පවත්වා ගැනීම සඳහා රජය සහ අදාළ සමාගම් එක්ව මෙලෙස මෙහෙයුම් කටයුතු පුළුල් කර ඇත.
